RamPrahar – The Navi Mumbai News Paper

पनवेल : प्रतिनिधी
पनवेल येथील महाराष्ट्रभूषण डॉ. नानासाहेब धर्माधिकारी उपजिल्हा रुग्णालय 200 बेडचे होणार आहे. त्याचप्रमाणे रुग्णालयात आयसीयूचे सहा बेड, तर डायलेसिसचे चार बेड लवकरच उपलब्ध होणार असल्याची माहिती आमदार प्रशांत ठाकूर यांनी शुक्रवारी (दि. 22) बोलावलेल्या बैठकीत देण्यात आली.
महाराष्ट्रभूषण डॉ. नानासाहेब धर्माधिकारी उपजिल्हा रुग्णालयातील कामाच्या लवकर पूर्ततेसाठी आमदार प्रशांत ठाकूर यांनी शुक्रवारी दुपारी सीकेटी महाविद्यालयात सार्वजनिक बांधकाम खात्याचे अधिकारी व रुग्णालयाचे अधीक्षक यांची संयुक्त बैठक बोलावली होती. या बैठकीला महापौर डॉ. कविता चौतमोल, नगरसेवक डॉ. अरुण भगत, सार्वजनिक बांधकाम खात्याचे उपअभियंता भोई, कनिष्ठ अभियंता किशोर जाधव, रायगड जिल्हा शल्यचिकित्सक सुहास माने, महाराष्ट्रभूषण डॉ. नानासाहेब धर्माधिकारी उपजिल्हा रुग्णालयाचे वैद्यकीय अधीक्षक डॉ. बसवराज लोहारे, प्रशासकीय अधिकारी सुभाष जाधव, कार्यालयीन अधीक्षक पल्लवी सावंत, सामाजिक कार्यकर्ते सतीश धारप उपस्थित होते.
या वेळी आमदार प्रशांत ठाकूर यांनी पनवेलच्या उपजिल्हा रुग्णालयातील विविध कामांचा आढावा घेतल्यानंतर पनवेल हे मुंबईच्या जवळ असलेले वाढत्या लोकसंख्येचे महानगर असल्याने येथील नागरिकांच्या सोयीसाठी आयसीयूचे सहा बेड, तर डायलेसिसच्या चार बेडचे काम एक महिन्यात तसेच ऑक्सिजन टँकचे काम लवकरात लवकर पूर्ण करण्याचे आदेश सार्वजनिक बांधकाम खात्याच्या अधिकार्‍यांना दिले. याबरोबरच रुग्णालयातील शस्त्रक्रियागृहातील प्लास्टर व पीयूसीची कामे करणे, रॅम दुरुस्त करणे आणि फायर ऑडिट करून घेण्याचे आदेश दिले.
पनवेल शहराजवळून दोन महामार्ग गेले असल्याने या महामार्गांवर मोठ्या प्रमाणात वाहनांचे अपघात होत असतात. त्यातील रुग्ण येथे उपचारासाठी आणले जातात. त्यांना अनेक वेळा रक्ताची गरज असते. यासाठी येथे ब्लड स्टोरेज आहे, पण रक्तपेढी नाही तसेच येथील रुग्णालय 120 बेडचे आहे ते 200 बेडचे करण्याचा आणि रक्तपेढीचा प्रस्ताव रायगड जिल्हा शल्यचिकित्सक सुहास माने यांना शासनाकडे पाठविण्यास आमदार प्रशांत ठाकूर यांनी या वेळी सांगितले.