जिल्हा रुग्णालयातील त्रुटी दूर करण्याचे पालकमंत्र्यांचे आदेश ; शासकीय रुग्णालयाला अचानक भेट

अलिबाग ः प्रतिनिधी  

रायगडचे पालकमंत्री रवींद्र चव्हाण यांनी मंगळवारी (दि. 14) अलिबाग येथील जिल्हा शासकीय रुग्णालयाला अचानक भेट देऊन रुग्णालयातील परिस्थितीचा आढावा घेतला. या वेळी रुग्णांनी तक्रारींचा पाढाच त्यांच्यासमोर वाचला. पालकमंत्र्यांच्या या भेटीमुळे वैद्यकीय अधिकारी-कर्मचार्‍यांची चांगलीच धांदल उडाली. या पार्श्वभूमीवर जिल्हा रुग्णालयातील त्रुटी तातडीने दूर करा, असे आदेश पालकमंत्री रवींद्र चव्हाण यांनी दिले. या वेळी सिडको अध्यक्ष आमदार प्रशांत ठाकूर हेदेखील त्यांच्या समवेत उपस्थित होते.

अलिबाग येथील जिल्हा रुग्णालयातील रुग्णसेवेबाबत अनेक तक्रारी पालकमंत्र्यांकडे आल्या होत्या. काही दिवसांपूर्वीच त्यांनी याबाबत कार्यकर्त्यांकडून माहिती घेतली होती. ज्येष्ठ निरूपणकार डॉ. आप्पासाहेब धर्माधिकारी यांची वाढदिवसानिमित्त भेट घेण्यासाठी पालकमंत्री रेवदंडा येथे आले होते. तेथून परतताना त्यांनी जिल्हा रुग्णालयाला अचानक भेट दिली. या वेळी भाजप अलिबाग-मुरूड विधानसभा मतदारसंघ अध्यक्ष अ‍ॅड. महेश मोहिते, पंचायत समिती सदस्य उदय कठे, राजेश पाटील, निलेश महाडिक, दर्शन प्रभू आदी त्यांच्या सोबत होते.

या वेळी त्यांनी रुग्णालयातील परिस्थितीची प्रत्यक्ष पाहणी करून रुग्णांशी संवाद साधला. रुग्णालयात मिळणार्‍या सुविधांचीही माहिती त्यांनी घेतली. व्यवस्थापनाच्या अभावामुळे रुग्णसेवेवर परिणाम होत असल्याचे या वेळी त्यांच्या निदर्शनास आले. जिल्हा रुग्णालयातील अस्वच्छतेबाबत त्यांनी या वेळी नाराजी व्यक्त केली.

बाह्यरुग्ण विभागात दररोज येणार्‍या रुग्णांची, तसेच त्यांच्यावर झालेल्या उपचाराची माहिती ई-मेलद्वारे पालकमंत्री,  जिल्हाधिकारी आणि शहरातील प्रमुख व्यक्ती आणि पत्रकारांना देण्याचे आदेश त्यांनी दिले.

रुग्णालयातील डॉक्टरांच्या रिक्त पदांचा आढावा त्यांनी घेतला. बाहेरून खासगी डॉक्टर बोलवा. त्यासाठी लागणारा निधी जिल्हा नियोजन मंडळाकडून देण्यात येईल, अशी ग्वाही त्यांनी दिली. सेवाभावी वृत्तीने जे प्रतिष्ठित डॉक्टर रुग्णालयात काम करण्यास तयार असतील, त्यांना संधी द्या. नादुरुस्त यंत्रणांची तातडीने दुरुस्ती करून घ्या, असे निर्देश त्यांनी रुग्णालय प्रशासनाला दिले.

-जिल्हा रुग्णालयात आहे त्या परिस्थितीत चांगली रुग्णसेवा कशी देता येईल यासाठी प्रयत्न करा. व्यवस्थित स्वच्छता राखली जात नसेल, तर बाहेरचे कंत्राटदार नेमून परिसराची स्वच्छता करून घ्या. डॉक्टरांची रिक्त पदे तत्काळ आऊटसोर्सिंगने भरा. बाह्य रुग्णसेवेची माहिती दररोज ई-मेलवर पाठवण्याची व्यवस्था करावी.  

-रवींद्र चव्हाण,

पालकमंत्री रायगड