नरेंद्र मोदी करिश्मा असलेले नेते ः रजनीकांत

नवी दिल्ली ः वृत्तसंस्था

लोकसभा निवडणुकीत भारतीय जनता पक्षाला मिळालेल्या अभूतपूर्व यशानंतर तामिळ सुपरस्टार रजनीकांत यांनी नरेंद्र मोदी यांना करिश्मा असलेले नेते म्हटले आहे. मोदी यांची प्रशंसा करताना त्यांनी राहुल गांधींबाबत सहानुभूती दाखवत टिप्पणी केली. काँग्रेसच्या वरिष्ठ नेत्यांनी राहुल गांधी यांना सहकार्य केले नाही. काँग्रेसच्या ज्येष्ठ नेत्यांना हाताळण्यासाठी राहुल खूपच तरुण आहेत, अशा शब्दांत रजनीकांत यांनी राहुल यांचे काँग्रेस पक्षातील स्थान अधोरेखित केले. दरम्यान, आपण 30 मे या दिवशी मोदी यांच्या शपथविधी सोहळ्याला उपस्थित राहणार असल्याचेही ते म्हणाले. रजनीकांत चेन्नईतील प्रसारमाध्यमांशी बोलत होते. भारतात इंदिरा गांधी आणि राजीव गांधी करिश्मा असलेले नेते होते. त्यांच्यानंतर आताच्या काळात नरेंद्र मोदी हे करिश्मा असलेले नेते आहेत. सध्या संपूर्ण देशात मोदी यांची लाट असल्याचेही रजनीकांत यांनी सांगितले.

सध्या काँग्रेस पक्षात राहुल गांधी यांच्या राजीनाम्यावरून चिंतेचे वातावरण पसरले आहे. काँग्रेसचे ज्येष्ठ नेते राजीनाम्यावर ठाम असलेल्या राहुल यांची समजूत काढण्याच्या प्रयत्नात आहेत. या विषयावर बोलताना राहुल गांधींनी राजीनामा देऊ नये असे मत रजनीकांत यांनी व्यक्त केले आहे. आपण दाखवून देऊ शकतो हे राहुल गांधी यांनी सिद्ध करून दाखवावे, असेही रजनीकांत म्हणाले. लोकशाहीत विरोधी पक्ष हा मजबूत असायला हवा. काँग्रेसच्या ज्येष्ठ नेत्यांनी निवडणुकीत विशेष मेहनत घेतली नसल्याचेही रजनीकांत म्हणाले. राहुल यांच्यात नेतृत्वगुण कमी आहेत, असे आपले म्हणणे नाही, मात्र त्यांच्यासाठी काँग्रेस पक्षाला हाताळणे कठीण आहे असे आपल्याला वाटते. काँग्रेस हा जुना पक्ष आहे.