नवीन पनवेलमधील पाण्याचा प्रश्न न सुटल्यास ठिय्या आंदोलनाचा भाजपचा इशारा

पनवेल : प्रतिनिधी

नवीन पनवेलमध्ये गेल्या अनेक दिवसांपासून अनियमित पाणीपुरवठा सुरू आहे. अधिकार्‍यांच्या ढिसाळ कारभारामुळे नागरिकांचे हाल होत असल्याने भाजपच्या नगरसेवक आणि लोकप्रतिनिधींनी सोमवारी (दि. 29) आक्रमक होत महाराष्ट्र जीवन प्राधीकरणच्या (एमजेपी) अधिकार्‍यांना धारेवर धरले. नवीन पनवेलमधील पाण्याचा प्रश्न सोमवारपर्यंत न सोडविल्यास एमजेपीच्या कार्यालयासमोर ठिय्या आंदोलन करू, असा इशारा पनवेल महापालिकेचे सभागृह नेते परेश ठाकूर यांनी या वेळी दिला.

जोरदार पाऊस पडत असतानाही नवीन पनवेल सेक्टर 15मधील पी 6 वसाहतीत गेला आठवडाभर पाणी नसल्याने नागरिक हैराण झाले आहेत. या वसाहतीत सिडकोने पाण्याच्या भूमिगत टाक्या न बांधल्याने बिल्डिंगमध्ये चौथ्या मजल्यापर्यंत पाणी चढण्यासाठी पाण्याचा दाब जास्त असावा लागतो, मात्र सध्या तो नसल्याने येथील रहिवाशांना पाणी मिळत नाही. त्यांना टँकरनेही पाणीपुरवठा करणे शक्य नसल्याने या नागरिकांचे खूप हाल होत आहेत.

या नागरिकांनी सोमवारी सकाळी स्थानिक नगरसेवक अ‍ॅड. मनोज भुजबळ यांची भेट घेऊन त्यांना पाण्याची समस्या सांगितली. यानंतर नगरसेवक अ‍ॅड. भुजबळ यांच्यासह सर्व जण सिडकोच्या कार्यालयात गेले. तेथील टाकीत पाणी आहे, पण जनरेटर दोन वर्षे बंद असल्याने पाणीपुरवठा करता येत नसल्याचे समजले. त्यामुळे जनरेटर त्वरित सुरू करण्याची मागणी या वेळी करण्यात आली. त्या ठिकाणी पाणीपुरवठा विभागाचे श्री. दलाल यांनी तीन दिवसांत पाणीपुरवठा सुरळीत करण्याचे आश्वासन दिले. मग सगळे एमजेपीच्या कार्यालयात गेले. उपमहापौर विक्रांत पाटील, सभागृह नेते परेश ठाकूर, प्रभाग समिती अध्यक्ष तेजस कांडपिळे, नगरसेवक प्रकाश बिनेदार, नितीन पाटील, नगरसेविका चारुशीला घरत, दर्शना भोईर, सुशीला घरत, अ‍ॅड. वृषाली वाघमारे आणि भाजप पदाधिकारी व कार्यकर्तेही तेथे आले. या सर्वांनी अधिकार्‍यांना जाब विचारला आणि पाणीपुरवठा सुरळीत करा, असे मागणीवजा सुनावले.