परेश ठाकूर यांच्याकडून सामाजिक कार्यासह क्रीडा क्षेत्राची उंची वाढविण्याचे काम

भाजप प्रदेश कार्यकारी अध्यक्ष रवींद्र चव्हाण यांचे गौरवोद्गार; पनवेल फुटबॉल लीगचे उद्घाटन

पनवेल ः रामप्रहर वृत्त
युवा नेते परेश ठाकूर यांचे समाजातील प्रत्येक घटकाबरोबर चांगले नाते असून युवा शक्ती त्यांच्या पाठिशी आहे. सामाजिक कार्यासह क्रीडा क्षेत्राची उंची वाढविण्याचे काम परेश ठाकूर यांनी केले असल्याचे गौरवोद्गार भाजपचे महाराष्ट्र प्रदेश कार्यकारी अध्यक्ष व माजी मंत्री रवींद्र चव्हाण यांनी खारघर येथे काढले.
पनवेल महानगरपालिकेचे माजी सभागृह नेते व युवा पिढीचे प्रेरणास्थान परेश ठाकूर यांच्या वाढदिवसानिमित्त भारतीय जनता युवा मोर्चा खारघरच्या वतीने आयोजित करण्यात आलेल्या पनवेल फुटबॉल लीग अर्थात स्थानिक फुटबॉल भव्य पर्वाला शुक्रवारी
(दि. 16) शानदार सुरुवात झाली. या स्पर्धेचे उद्घाटन भाजप प्रदेश कार्याध्यक्ष रवींद्र चव्हाण यांच्या हस्ते आणि माजी खासदार लोकनेते रामशेठ ठाकूर यांच्या प्रमुख उपस्थितीत झाले. त्या वेळी मार्गदर्शन करताना चव्हाण बोलत होते.
उद्घाटन समारंभास प्रमुख मान्यवर म्हणून आमदार प्रशांत ठाकूर, आमदार विक्रांत पाटील, माजी नगराध्यक्ष जे.एम. म्हात्रे, भाजपचे उत्तर रायगड जिल्हाध्यक्ष अविनाश कोळी, महापालिकेचे माजी सभागृह नेते परेश ठाकूर, माजी विरोधी पक्षनेते प्रितम म्हात्रे, खारघर मंडळ अध्यक्ष प्रवीण पाटील, माजी नगरसेवक अनिल भगत, हरेश केणी, गणेश कडू, पापा पटेल, अभिमन्यू पाटील, शत्रुघ्न काकडे, नरेश ठाकूर, गुरूनाथ गायकर, युवा नेते हॅप्पी सिंग, माजी नगरसेविका हर्षदा उपाध्याय, नेत्रा पाटील, जिल्हा चिटणीस ब्रिजेश पटेल, वासुदेव पाटील, समीर कदम, दीपक शिंदे, युवा मोर्चाचे जिल्हाध्यक्ष मयुरेश नेतकर, प्रवीण बेरा, माजी सरपंच संजय घरत, महिला मोर्चा शहर अध्यक्ष साधना पवार, युवा मोर्चा शहर अध्यक्ष नितेश पाटील, संतोष शर्मा, संध्या शारबिद्रे, अभिषेक भोपी, तेजस जाधव, अजिंक्य नवघरे यांच्यासह पदाधिकारी, कार्यकर्ते, क्रीडाप्रेमी मोठ्या संख्येने उपस्थित होते.
खारघरमधील सेक्टर 7 येथील पं. दीनदयाळ उपाध्याय मैदानावर ही स्पर्धा होत असून विजेत्या संघाला 50 हजार रुपये व चषक, द्वितीय क्रमांकाला 25 हजार व चषक आणि तृतीय क्रमांकास 10 हजार रुपये व चषक असे मुख्य बक्षिसांचे स्वरूप आहे.
परदेशात फुटबॉल प्रीमिअर लीग खेळली जाते. ती स्पर्धा लहान आयोजनातून उत्तरोत्तर मोठी झाली आणि या स्पर्धेचा जगभर नावलौकिक झाला. आपल्या देशात विशेषतः हा खेळ क्रिकेटप्रमाणे जास्त खेळला जात नाही, पण शारीरिक व्यायाम व तंदुरूस्तीच्या बाबतीत हा खेळ गणला जातो. या खेळाची आवड तरुणाईमध्ये निर्माण होण्यासाठी पनवेल फुटबॉल लीगच्या माध्यमातून प्रयत्न होत आहे. तरुणांना प्रोत्साहन देणारा आणि एकोपा निर्माण करणारा हा खेळ असल्याने या खेळाचाही प्रसार व प्रचार झाला पाहिजे आणि स्थानिक फुटबॉलपटूंना व्यासपीठ मिळाले पाहिजे या दृष्टिकोनातून लीगचे आयोजन करण्यात आले आहे.
या लीगमध्ये खारघर किंग, तळोजा टायटन्स, कळंबोली वॉरिअर्स, कामोठे नाईट्स, पनवेल सिटी फुटबॉल क्लब, पनवेल पॅन्थर, न्यू पनवेल युनायटेड, खांदा कॉलनी स्ट्रायकर्स या आठ संघाचा आणि नामवंत खेळाडूंचा भरणा आहे. ही स्पर्धा केवळ खेळापुरती मर्यादित नाही, तर तरुणांना खेळाकडे वळविणारा एक स्तुत्य उपक्रम ठरत आहे. उद्घाटन समारंभात आठ संघाच्या मालकांचा सत्कार करण्यात आला.
या वेळी बोलताना माजी मंत्री रवींद्र चव्हाण यांनी परेश ठाकूर यांच्या कार्याचा गौरव केला. ते पुढे म्हणाले की, निरोगी शरीर सर्वात मोठी संपत्ती आहे. तरुणांनी व्यसनाधीन होऊ नये यासाठी स्वामी विवेकानंद यांनी मैदानी खेळाकडे वळण्याचा कायम आग्रह धरला. युवाशक्ती पुढे जाण्यासाठी मुख्यमंत्री देवेंद्र फडणवीस यांनी जाज्वल राष्ट्रप्रेम आणि क्रीडा क्षेत्राला महत्त्व दिले. परेश ठाकूर आणि टीम सातत्याने विविध उपक्रम राबवित आहे. त्या अनुषंगाने खेळाडू आणि खेळाला मान-सन्मान देण्याचे काम केले जात आहे. या क्रीडानगरीचा देखावा राष्ट्रीय स्पर्धांप्रमाणे आहे. तरुणांना आकर्षित करणारा हा क्रीडा महोत्सव असून अशा दर्जेदार उपक्रमातून आणि सामाजिक सेवेतून परेश ठाकूर यांचे कार्य नेहमीच अधोरेखित झाले आहे, असे सांगतानाच परेश ठाकूर यांच्यावर असलेल्या प्रेमापोटी दरवर्षी मी वाढदिवसाला येत असल्याचेही त्यांनी नमूद केले.
आमदार विक्रांत पाटील यांनी आपल्या भाषणात सांगितले की, पनवेल शहराचा विकास झाला पाहिजे हा दृष्टिकोन माजी सभागृह नेते परेश ठाकूर यांचा कायम राहिला आहे. सभागृह नेते म्हणून आम्ही त्यांच्याबरोबर सभागृहात काम केले, तेव्हा त्यांचा विकासाचा दृष्टिकोन जवळून बघितला आहे. एखादा विषय हाती घेतल्यावर विचार करून फक्त आदेश देऊन सोडायचे नाही, तर विषय पूर्ण होईपर्यंत त्याच्यावर सातत्याने पाठपुरावा करायचा पिंड परेश ठाकूर यांचा राहिला आहे. त्यामुळे विषय पूर्णत्वास नेण्याची मानसिकता अधिकारीवर्गाचीही असते. मन लावून काम करणारा नेता म्हणून परेश ठाकूर यांच्याकडे पाहिले जाते. पनवेलच्या पायाभूत सुविधांचा विकास करण्याचे काम त्यांनी केले. त्याचबरोबर युवाशक्तीला विविध सामाजिक उपक्रमातून पुढे आणण्याचे कामही त्यांनी यशस्वीपणे केले आहे. परेश ठाकूर यांच्या शैक्षणिक, क्रीडा क्षेत्रातील योगदानाचाही उल्लेखही आमदार विक्रांत पाटील यांनी करीत समाजसेवेचा वसा अखंड चालू राहण्यासाठी त्यांना उदंड आयुष्य लाभो, अशा शब्दांत शुभेच्छा दिल्या.
भाजप उत्तर रायगड जिल्हाध्यक्ष अविनाश कोळी यांनी आपल्या भाषणात सांगितले की, माजी सभागृह नेते परेश ठाकूर यांचा वाढदिवस म्हणजे विविध सामाजिक उपक्रमांची पर्वणी असते. पनवेल महापालिकेचे नेतृत्व त्यांनी ज्या पद्धतीने केले आहे ते वाखाण्याजोगे आहे आणि त्या अनुषंगाने त्यांनी महापालिका हद्दीत विकासाचा आलेख उंचावला. परिसरातील विकासकामे करण्याबरोबरच जनतेच्या समस्या सोडवण्याचे काम ते करीत आले आहेत. फक्त अधिकार्‍यांना सांगणेच नाही, तर त्या विषयाचा शेवटपर्यंत पाठपुरावा करून प्रश्न मार्गी लावण्याचे काम ते करतात. केंद्र असो की राज्य भाजपच्या वतीने दिलेला प्रत्येक कार्यक्रम युवा नेते परेश ठाकूर यांच्या नेतृत्वाखाली यशस्वी होत असतो. त्यांच्या कामाची पद्धत ही उत्तम आणि सामाजिक तळमळ असणारी आहे. त्यामुळे आगामी पनवेल महापालिकेचा महापौर म्हणून परेश ठाकूर यांना आम्हाला पहायचे आहे, असेही अविनाश कोळी यांनी या वेळी म्हटले.
माजी सभागृह नेते परेश ठाकूर यांनी बोलताना सांगितले की, पनवेल विधानसभा क्षेत्रात क्रीडा क्षेत्राला प्राधान्य देण्याचे काम होत आहे आणि त्यासाठी भारतीय जनता पक्ष रायगड आणि युवा मोर्चा सक्रियतेने काम करीत आहे. विशेषत्वाने आमदार प्रशांत ठाकूर यांचे या विषयाकडे लक्ष असते. ते नेहमी सामाजिक कार्यासोबतच क्रीडा क्षेत्राला महत्त्व देत असतात. खेळ आणि खेळाडूंचा विकास होण्याच्या दृष्टिकोनातून प्रयत्न केला जात आहे. मागील वर्षी अशाच प्रकारे माझ्या वाढदिवसानिमित्त विविध क्रीडा स्पर्धांचे आयोजन करण्यात आले होते तसेच नमो चषकचे सलग दोन वर्षे आयोजन करून नवोदित खेळाडूंना व्यासपीठ मिळवून देण्यात आले असून एक लाखाहून अधिक स्पर्धकांनी सहभाग घेऊन ही स्पर्धा उत्स्फूर्तपणे मोठ्या प्रमाणात यशस्वी केली होती. भाजपने जेव्हा जेव्हा असे कार्यक्रम दिले ते यशस्वी करण्याचे काम केले असल्याचेही त्यांनी नमूद केले.
शारीरिक आणि मानसिक समाधान मिळत असल्याने क्रीडा क्षेत्राकडे तरुणाई वळत आहे, असे सांगत माजी कर्णधार दिलीप वेंगसरकर यांची क्रिकेट अकादमी पनवेलमध्ये सुरू झाली आहे. अशाच प्रकारे पनवेल महापालिका हद्दीत विविध ठिकाणी क्रीडा संकुल आणि मैदान विकसित करण्याचे काम हाती घेण्यात येत असल्याचीही माहिती परेश ठाकूर यांनी या स्पर्धेच्या निमित्ताने दिली. प्रास्ताविक युवा मोर्चाचे जिल्हाध्यक्ष मयुरेश नेतकर यांनी केले.