रश्मिका मंदान्ना; दक्षिणेकडील अभिनेत्रींचे राज्य ही परंपराच!

आजच्या डिजिटल युगात आणि ओटीटीने जगभरातील अनेक भाषेतील चित्रपट, वेबसिरीज घरबसल्या पाह्यला मिळताहेत अशा वेळी मल्टीप्लेक्समध्ये चित्रपट हाऊसफुल्ल गर्दीत यशस्वी ठरले त्या कलाकाराची चित्रपटाची निवड सकारात्मक आहे आणि त्या कलाकाराला पाहण्यासाठी चित्रपट रसिकांना विशेष रस आहेच असेच अधोरेखित होत आहे आणि ती अभिनेत्री आहे, रश्मिका मंदान्ना!
सुकुमार दिग्दर्शित पुष्पा आणि पुष्पा 2 संदीपा रेडी दिग्दर्शित अ‍ॅनिमल, लक्ष्मण उतेकर दिग्दर्शित छावा, सेखर कनमुला दिग्दर्शित कुबेरा, आदित्य सरपोतदार दिग्दर्शित थामा असा एक एक चित्रपट सुपरहिट होतोय, त्यावरून सोशल मीडियात काही चर्चा होतेय आणि काही आठवड्यांतच आणखी एक चित्रपट प्रदर्शित होतोय तोदेखील सुपरहिट.
हे सर्व पॅन इंडिया चित्रपट संस्कृतीतील चित्रपट आहेत. एका भाषेत निर्माण करुन अन्य भाषेत डब करून जगभरातील अधिकाधिक प्रेक्षकांपर्यंत पोहोचलेले चित्रपट आहेत. दक्षिणेकडील एका प्रादेशिक भाषेतील चित्रपट तिकडच्या अन्य भाषेत आणि हिंदी भाषेत डब करून ते प्रदर्शित होत आहेत आणि त्यात एक हुकमी मटार आहे, रश्मिका मंदान्ना.
कौन बनेगा करोडपतीमध्ये एकदा मराठवाड्यातील महाराष्ट्रीय स्पर्धक छान उत्तरे देत असतानाच अमिताभ बच्चननी त्याला त्याची आवडती अभिनेत्री कोण असं विचारलं असता त्यांनी रश्मिका मंदान्ना हिचे नाव घेतले. काही वेळानंतर व्हिडिओ कॉलने रश्मिका मंदान्ना स्क्रीनवर आली आणि तो स्पर्धक विलक्षण आनंदला, खुलला. आता अमिताभ बच्चन श्रोता आणि त्या दोघांनी एकमेकांशी संवाद साधला. आणि तोदेखील तेलगू भाषेत. अमिताभही अवाक झाले आणि मग त्यानी त्या स्पर्धकाला तुम्ही काय म्हणालात असे विचारले… त्याने चक्क तिला मी तुझा जबरदस्त चाहता असून तू मला आवडते, मला तुला भेटायला मिळाले तर आवडेल असे म्हटले होते आणि तिनेही छान हसत सकारात्मक प्रतिसाद दिला होता…
झी मनोरंजन उपग्रह वाहिनीच्या एका दिमाखदार सोहळ्यात रश्मिका मंदान्ना खास महाराष्ट्रीयन साडीत आली आणि तिने पक्कडबाज नृत्य देखील साकारले.
अशी आपली चौफेर घौडदौड सुरू असतानाच तिने आपल्या विजय देवरक़ोडा यांच्यासोबत असलेल्या मनमोकळ्या मैत्रीची, जुळलेल्या मनाची व ह्रदयाची कबूली दिली आणि ती बातमी ट्रेडिंगवर राहिली.आज रश्मिका मंदान्ना सुपर स्टार आहे. आज ती मुंबईत असो, हैदराबादला असो, चैन्नईत असो, बंगलोरला असो, त्रिवेंद्रमला असो, मिडिया तिच्या मागावर असतोच असतो. ती विमानतळावर जाऊ देत वा विमानतळाबाहेर ती पडू देत पाप्पाराझी तिच्यावर भराभर फ्लॅश उडवतात. रिल बनवतात. ते सोशल मीडियावर पोस्ट होताच भरभरून लाईक्स मिळतात. विशेष उल्लेखनीय गोष्ट ती कुठेही गेली, कितीही घाईत असली ती फोटोग्राफर आणि चाहते यांना अजिबात नाही म्हणत नाही. निराश करीत नाही. अनेक सेलेब्रिटीजनी हा गुण नक्कीच घ्यावा. फोटोग्राफर, पाप्पाराझी तुम्हाला सतत फोकसमध्ये ठेवतात आणि चाहते तुमघा चित्रपट पाहतात. तुमचे कौतुक करतात.
अतिशय स़ोप्या शब्दात सांगायचे तर रश्मिका मंदान्नाने विद्या बालन, दीपीका पादुकोन, कैतरिना कैफ यांना बाजूला सारलेय. माधुरी दीक्षित आपल्या स्थानावर कायम आहे.
तसं पाहिलं तर, दक्षिण भारतीय अभिनेत्रीने हिंदी चित्रपटसृष्टीवर राज्य करण्याच्या यशस्वी परंपरेत रश्मिका मंदान्नाचं नाव घ्यायची वेळ तिनेच आणली आहे बघा….स्वतःचे मार्केटींग करण्याच्या आजच्या युगात रश्मिका मंदान्नाने चित्रपटाच्या यशाच्या जोरावर आपले स्थान निर्माण केले आहे.
आता थोडा फ्लॅशबॅक….
वैजयंतीमाला, हेमा मालिनी, रेखा, श्रीदेवी, जयाप्रदा या प्रत्येकीने,
आपलं सौंदर्य, नृत्य, अभिनय आणि लोकप्रियता या केमिस्ट्रीच्या जोरावर आपली स्पेस, ’ नंबर वन’ चे स्थान निर्माण करण्यात यशस्वी ठरल्या. चित्रपटाच्या जगात यश हेच चलनी नाणे आहे आणि ते ज्याना लाभते तो स्टार असे अगदी सोप्पे समीकरण आहे. एक सुपर हिट चित्रपट पाहिजे, बस्स असे उगीच म्हणत नाहीत.
त्याच प्रगती पुस्तकात आता रश्मिका मंदानन्ना हे नाव घेतलें जाते. सोशल मीडियात पहा तुम्हाला याची खात्री पटेल.आता तुमच्यातील काही मंडळी म्हणतील, ही तर तमिळ, तेलगू, कन्नड चित्रपटाची अभिनेत्री…म्हणून काय झालं? आता एका चित्रपटसृष्टीतील कलाकार अन्य भाषेतील चित्रपटात लक्षवेधक ठरतात. आपले सयाजी शिंदे, सचिन खेडेकर, रवि काळे, अंजली पाटील, श्रृती मराठे दक्षिणेकडील प्रादेशिक भाषेतील चित्रपटात छान काम करताहेत. रश्मिका मंदान्नाचे हिंदीतले प्रगती पुस्तक आत्ता आत्ता कुठे चांगल्या गुणांचं ठरत असताना तिला लगेच आपण हिंदी चित्रपटसृष्टी वर एकेकाळी राज्य करणार्‍या वैजयंतीमाला, हेमा मालिनी, रेखा, श्रीदेवी जयाप्रदा या साउथ इंडियन अर्थात दक्षिण भारतीय अभिनेत्रींच्या वाटचालीस ती ती पुढे नेते असं म्हणायचं का?
तर याचं उत्तर होय आहे, होय.
वैजयंतीमाला साठच्या दशकातील हिंदी चित्रपटसृष्टीतील टॉपची त्रिमूर्ती दिलीप कुमार, देव आनंद आणि राजकपूर या तिघांचीही एकाच वेळी नायिका होती. या तिघांसोबतची रुपेरी पडद्यावरील तिची प्रणय दृश्य आजही तजेलदार वाटतात. राज कपूर अभिनित व दिग्दर्शित संगम पहा.ती राजेंद्र कुमार, शम्मी कपूर, सुनील दत्त, धर्मेंद्र इत्यादींचीही ती नायिका झाली. त्या काळात नंबर वनची अभिनेत्री ठरवण्याचा फंडा होता, टॉपच्या हीरोंसोबत नायिका साकारण्यात जास्त यशस्वी कोण ठरतयं. तर वैजयंतीमाला. काळाला सुसंगत होता हो तो फंडा.
हेमा मालिनीने बी. अनंत स्वामी दिग्दर्शित ’सपनो का सौदागर’ पासून रुपेरी पडद्यावर पाऊल टाकताच ती रसिकांच्या स्वप्नांची राणी झाली. तिला पहिल्याच चित्रपटामध्ये ड्रीम गर्ल अशी उपाधी दिली आणि त्या ड्रीम गर्लने सत्तरच्या दशकात हिंदी चित्रपटसृष्टीवर राज्य केलं. धर्मेंद्रला आपलसं केलं. रेखानेही आपला अभिनय, सौंदर्य , गॉसिप्स आणि लोकप्रियता या गुणांवर प्रचंड लोकप्रियता संपादली. अभिनय, लोकप्रियता यातही ’लंबू’ असलेल्या अमिताभ बच्चनशी तिचे खास नाते निर्माण झाले. टॉपवर राहताना असेही फंडे सपोर्ट सिस्टीम ठरतात. आजही या जोडीबद्दलच्या अनेक कथा, किस्से, दंतकथा, गॉसिप चघळले जाते. सोशल मीडियात चर्चेत असते.
फोटोसेशनच्या
बाबतीतही रेखाच नंबर वन. रेखाचा एकूणच उत्साह फारच दांडगा. आजही रेखा कोणत्याही इव्हेंटला आली रे आली की आजच्या पिढीचे तमाम फोटोग्राफर, व्हिडिओवाले धडाधड फ्लॅश उडवतात. लोकप्रियचे गणित म्हणजे दुसरं काय असतं? हेच तर असते.
श्रीदेवीने ’ हिम्मतवाला’( 1983)त जितेंद्रसोबत ताथय्या ताथय्या ओ गाण्यात अशा पद्धतीने नृत्य केलं आणि रुपेरी पडदा व्यापून टाकला तिला बघता बघता ती स्टार झाली. ती ’हिम्मतवाली ’ म्हणून ओळखली जाऊ लागली. आणि श्रीदेवीचे युग आलं. इन्किलाब, मिस्टर इंडिया, आखरी रास्ता, नगीना, रुप की रानी चोरों का राजा, नजराना अशा चित्रपटांमध्ये ती तर त्या चित्रपटाच्या नायकांच्या वरचढ ठरल्याचं दिसलं. एक अतिशय लक्षवेधक, बहुचर्चित उदाहरण द्यायचं झालं तर पंकज पराशर दिग्दर्शित चालबाज या चित्रपटातील श्रीदेवीची दुहेरी भूमिका. चित्रपटांमध्ये सनी देवल व रजनीकांत असे दोन नायक होते परंतु संपूर्ण सिनेमा देवीच्या डबलरोलने व्यापून टाकला. एक डॅशिंग आणि एक सरळसाधी. पिक्चर रमेश सिप्पी दिग्दर्शित ’सीता और गीता’ ची रिमेक. त्यात हेमा मालिनीची दुहेरी भूमिका. तरी चालबाजला नवा चेहरा देण्यात श्रीदेवी यशस्वी ठरली. यश चोप्रा दिग्दर्शित ’चांदनी व लम्हे श्रीच्या करियरमधील हायपॉईंट. सर्वोच्च बिंदू.
जयाप्रदानेही आपल्या सौंदर्य अभिनय आणि नृत्य या गुणांवर हिंदी चित्रपटसृष्टीवर राज्य केलं. ख्यातनाम दिग्दर्शक सत्यजित रे यांनी एकदा जयाप्रदाला प्रमाणपत्र देताना असं म्हटलं की, भारतीय पारंपारिक सौंदर्याचा प्रतीक म्हणून आपण जयाप्रदाचे नाव घेऊ शकतो.
वैजयंतीमाला ते जयाप्रदा या साऊथच्या तडकामध्ये एक गोष्ट कॉमन कॉमन. पाचही जणींनी भारतीय सौंदर्याचे प्रतीक साडीला आवर्जून महत्व दिलेय. वेगवेगळ्या पद्धतीच्या साड्यांमध्ये या अभिनेत्रींनी सातत्याने रुपेरी पडल्यावर दर्शन घडवलं. फोटोसेशनमध्ये सुद्धा त्या साडीमध्ये छान दिसल्या. त महत्त्वाच्या इव्हेंट्समध्ये त्या कायमच साडीत आल्या. मग ती साडी कांजीवरम असेल किंवा अन्य कुठल्याही पद्धतीची असेल. या परंपरेत भारती, मीनाक्षी शेषाद्री, भानुप्रिया, शांतीप्रिया, जयासुधा अशा आणखीन काही साऊथ इंडियन अभिनेत्रीची नाव देता येतील.
आजच्या गतिमान युगात रश्मिका मंदान्नाने आपली ओळख निर्माण केलीय. आता काळ बदललाय. चित्रपटाच्या यशापयशसह आणखीन दोन गोष्टी महत्वाच्या. एक म्हणजे दक्षिणेकडचे चित्रपट तिकडच्या भाषेसोबतच हिंदीमध्ये डब येत आहेत. आणि तिकडचे स्टार त्या पिक्चरसह हिंदी पिक्चर्सच्या रसिकांना माहित पडताहेत. जग जवळ आलयं म्हणतात ते असेही आहे. ’पुष्पा द राईज’ ने रश्मिकाला आपल्या आणखीन जवळ आणले. श्रीवल्ली आणि सामे सामे या दोन गीत संगीत व नृत्यात रश्मिका छा गयी. गाणी सुपर हिट म्हणजे कलाकार सतत नजरेसमोर राहतो. आजच्या डिजिटल पिढीचा दुसरा फंडा सोशल मिडिया. गुगलवर रश्मिका मंदान्ना सर्च एकदम भारी आहे. सोशल मिडियात तिच्या रिल, फोटो, मुलाखती यांचे सातत्य केवढे तरी.आणि आज चित्रपट पाहण्यास भाषेची समस्या नसते. सबटायटल्स मोठाच फंडा. त्यामुळेच रश्मिकाचे किरीक पार्टी, अंजनीपुत्र, गीत गोविंदम हे साऊथ मुव्हीज हिंदी चित्रपटाचा प्रेक्षकही आवडीने बघतोय. तिचे फॅन फॉलॉवर्स खूप आहेत. तिच्यावर खूप मोठ्या प्रमाणावर लिहिलं जातय, वाचलं जातेय, पाहिलं जातेय. तिची प्रत्येक छोटी छोटी गोष्ट जणू न्यूज होतेय. तिची आकर्षक पर्सनॅलिटी, तिचं रुपडं, तिचं नृत्य, तिचा अभिनय यात ती लक्षवेधक ठरतेय. खरं तर तिच्या अभिनयाबद्दल बोलावं/ सांगावं अशी संधी तिला अजून फारशी मिळालेली नाहीये. परंतु दक्षिण भारतीय सिनेमांमध्ये ज्या पद्धतीचे नायिकेचे संकोच नसलेले जे व्यक्तिमत्व लागतं त्यात रश्मीकामध्ये नक्कीच आहे, त्यामुळे बदलत्या काळानुसार, सोशल मीडियाच्या युगानुसार आणि ग्लोबल युगातील एक यशस्वी अभिनेत्री म्हणून रश्मिका मंदानाचंच नाव आवर्जून घेता येईल. म्हणून मी म्हणतो वैजयंतीमाला ,रेखा, हेमा, श्रीदेवी यांच्या वाटचालीला पुढे नेणारी अभिनेत्री आहे रश्मीका मंदान्ना. दक्षिणेकडील काजल अग्रवाल, अनुष्का शेट्टी, ऋत प्रभू, कीर्ती सुरेश, नयनतारा, सई पल्लवी, पूजा हेगडे इत्यादी अभिनेत्री दक्षिणेबरोबर हिंदी चित्रपटांमध्ये सुद्धा भूमिका साकारताहेत. स्पर्धा तगडी आहे. साउथच्या सिनेमांनी हिंदी चित्रपटसृष्टीवर आक्रमण केलेले आहे त्या आक्रमणातला एक जबरदस्त फंडा रश्मिका मंदान्ना. आजची ती टॉपचे अभिनेत्री आहे एवढं नक्कीच.
बदलत्या काळासोबत यश/ पोझिशन यांच्या व्याख्या बदलल्यात आणि त्यात रश्मिका मंदान्ना एकदम सही है भिडू. एक अतिशय प्रसन्न व्यक्तिमत्त्व. बोलका चेहरा आणि तिला यशाची घाई नाही. तर मग आणखीन काय हवे? रश्मिका मंदान्ना आजच्या ग्लोबल युगातील डिजिटल पिढीतील पॅन इंडिया चित्रपट संस्कृतीतील नंबर वनची अभिनेत्री आहे. तिची प्रत्येक लहान मोठी गोष्ट आज न्यूज बनतेय तर मग आणखी काय हवे? तिच्या मधाळ हास्यावर विलक्षण फिदा असणारे अगणित आहेत. केवळ तेवढ्यासाठी सोशल मीडियात नजर टाकायला काय हरकत आहे असा अनेकांचा प्रश्न आहे….
चाहनेवाले आपका जवाब नहीं. विजय देवरकोडा आणि रश्मिका मंदान्ना यांचा
लग्नं सोहळा आतापर्यंतच्या सेलिब्रिटी लग्नाचे लोकप्रियतेचे सर्व विक्रम मोडीत काढणार हे आताचं स्पष्ट झाले आहे…
-दिलीप ठाकूर, चित्रपट समिक्षक