लहान मुलांमधील ताप

लहान मुलांमधील ताप काळजी करायला लावणारा असतो, परंतु अंगाला हात लावून जाणवत जरी असला तरी प्रत्यक्षपणे थर्मामीटरवर मोजणे गरजेचे आहे. हल्ली तर इलेक्ट्रॉनिक थर्मामीटरवर प्रत्यक्षात ताप अंकामध्ये दिसत असल्याने ताप मोजणे सोपे झाले आहे. मुलाला ताप असेल तर डॉक्टरांकडे जाण्यापूर्वी ताप किती वाजता व किती आला होता, कोणते औषध दिले, ताप किती वेळात उतरला या सर्व गोष्टींची नोंद एका कागदावर करून ठेवावी, जेणेकरून डॉक्टरांनाही उपचार करणे सोपे होते. ताप मोजण्यापूर्वी थर्मामीटरचा पारा 98 अंश एफच्या खाली उतरवा. काखेत ताप मोजण्यापूर्वी तो भाग घामविरहित पुसून ठेवा.

तापात घरी काय काळजी घ्यावी?

बर्‍याचदा तापामध्ये विश्रांती पुरेशी असते. जर बाळ तापातही हसत-खेळत असेल, व्यवस्थित खात-पीत असेल, ताप उतरल्यावर उत्तमपणे खेळत असेल तर हा गंभीर आजार नाही. अशा वेळी डॉक्टरांच्या सल्ल्याने बाळाला पॅरासिटामॉल देण्यास हरकत नाही. तापात बाळ मलूल असेल, उलटी करीत असेल, शरीरातील पाण्याचे प्रमाण कमी असेल, तर ताप गंभीर आजारामुळे असू शकतो.

ताप कमी करण्यासाठी…

-खुल्या हवेचा वापर.

-शरीरावरील कपडे ढिले करून मोकळे करावेत.

-शरीर ओल्या कापडाने पुसून काढावे.

-डॉक्टरांनी सांगितल्याप्रमाणे तापाचे औषध द्यावे.

हे करू नका

-बाळाला स्वेटर, चादर, रगमध्ये गुंडाळू नये.

-नळाखाली थंड पाण्याने आंघोळ घालू नये.

-बर्फ घातलेल्या पाण्याने अंग पुसू नका.

 बाळाला ताप कमी होण्यासाठी पॅरासिटॅमॉल हेच औषध तापामध्ये देणे योग्य आहे. या औषधाचे सर्वात कमी दुष्परिणाम आहेत. ताप पूर्णपणे कमी येण्यापेक्षा आजारावर नेमके काम करणार्‍या औषधांची यामध्ये आवश्यकता असते. पूर्णपणे ताप कमी करणेही योग्य नसते. पॅरासिटॅमॉल हे चार ते सहा तासच काम करत असल्याने बाळाचा आजार खरंच कमी होतो का नाही ते समजते. समजा पहिल्या दोन दिवसांत औषध चार वेळा द्यावे लागले. तिसर्‍या दिवशी 2 ते 3 वेळा, चौथ्या दिवशी एक ते दोन वेळा औषध दिले म्हणजे बाळाचा आजार कमी होत चालला आहे. विषाणूजन्य आजार सर्वसाधारणपणे तीन ते चार दिवसांत बरे होतात.