शिरगाव-महाड रस्त्याचे काम संथगतीने

दीड किमी अंतराला लागले तीन महिने, वाहनचालकांसह प्रवासी त्रस्त

महाड : प्रतिनिधी

शहरानजीक असलेल्या महाड-शिरगाव गावा दरम्यानच्या रस्त्याच्या काँक्रीटीकरणाचे काम संथगतीने सुरु असून अवघ्या दीड किमी अंतराच्या या कामास  तीन महिने लागल्याने रस्त्याशेजारील ग्रामस्थ आणि वाहनचालक कमालीचे त्रस्त झाले आहेत. शहरालगत असलेल्या या कामाकडे सार्वजनिक बांधकाम विभागाचे अधिकारीदेखील दुर्लक्ष करत असल्याने ठेकेदाराला रान मोकळे झाले आहे. महाड शहरातून विन्हेरे तुळशीखिंड मार्गे खेड आणि दापोली, मंडणगड, महाप्रळकडे जाणारे मार्ग दादली, शिरगाव या गावांना जोडत जातात. सध्या महाड-महाप्रळ-पंढरपूर तसेच दापोलीमधील आंबडवे गावाला जोडणार्‍या रस्त्यांचे काम सुरु आहे. यातील एक टप्पा महाड-दादली-शिरगाव या गावांदरम्यान सुरु आहे. काँक्रीटीकरणाबरोबरच   रस्त्याचे रुंदीकरणदेखील केले जात आहे. याकरिता मूळ डांबरी रस्ता पूर्णपणे उखडून टाकला आहे. दोन्ही बाजूला मातीचा भराव केल्या नंतर काही दिवसातच हे काम संथगतीने केले जात आहे. दोन महिन्यापूर्वी रस्त्याचे काम सुरु करण्यात आले होते. शिरगाव-दादली हे अंतर जेमतेम दीड किमी आहे. शिवाय महाड शहरालगत असल्याने याठिकाणी सतत वर्दळ सुरु आहे. आंबेत पूल बंद असल्याकारणाने दापोली, मंडणगड, महाप्रळकडे जाणारी तर महामार्गाचे काम सुरु असल्याने खेडकडे जाणारी वाहनेदेखील याच मार्गावरून ये-जा करत आहेत. दादली-शिरगाव दरम्यान रस्त्याचे काम सुरु असल्याने आणि पक्का पर्यायी मार्ग न केल्याने याठिकाणी वाहतूक कोंडी होत आहे. या वाहतूक कोंडीचा स्थानिक वाहनचालकांनादेखील प्रचंड त्रास सहन करावा लागत आहे. महाड जवळील सावित्री नदीवर असलेला दादली पुलावरील रस्ता आधीच खराब झाला असून, त्यापुढे सुरु असलेल्या या रस्त्याच्या कामामुळे दादली आणि शिरगाव दरम्यान असलेल्या नागरिकांना धुळीचादेखील सामना करावा लागत आहे. दादली-किंजळघर गावातील अनेक घरे या रस्त्यालगत आहेत. वाहनचालकांच्या वर्दळीमुळे रस्त्यावरील धूळ घरातून जात असल्याने घरात मोठ्या प्रमाणात धूळ साचत आहे. शिवाय दादली, शिरगाव याठिकाणी असलेल्या खाद्यपदार्थ विक्रेत्यांचेदेखील हाल झाले आहेत. शिवाय ज्या ठिकाणी रस्ता बदल केला आहे त्याठिकाणी कोणत्याच प्रकारचे फलक लावलेले नाहीत. यामुळे वाहनचालकांवर रस्ता चुकण्याची वेळ येत आहे. महाड-शिरगाव रस्त्याचे काम सुरु करताना पर्यायी डांबरी रस्ता किंवा मुख्य काँक्रीट रस्त्याच्या शेजारील साईडपट्टी डांबरीकरण करणे आवश्यक असताना संबंधित ठेकेदाराने पर्यायी रस्ता न करताच काँक्रीटीकरणाचे काम सुरु केल्याने वाहनचालकांना मोठा त्रास सहन करावा लागत आहे.