आदई सर्कल ते चिपळे मार्गावर गतिरोधक बसवा

पनवेल : रामप्रहर वृत्त

आदई ते चिपळे या रस्त्यावर गतिरोधक बसविण्याची मागणी रायगड जि. प. सदस्य अमित जाधव व पनवेल पं. स. सदस्य भूपेंद्र पाटील यांनी एका पत्रकाद्वारे केली आहे. आदई ते चिपळे हा रस्ता नव्याने बांधण्यात आला आहे. सदर रस्ता रहदारीचा असल्याने तेथे सतत वाहनांची ये-जा सुरू असते. वाहनचालक बेदरकारपणे वेगात वाहने चालवत असल्याने येथे अपघात होत असून, यामध्ये जीवितहानीही झालेली आहे. त्यामुळे या रस्त्यावर गतिरोधक बसविण्याची मागणी जोर धरत आहे. येत्या 10 दिवसांत गतिरोधक बसविले नाहीत, तर रास्ता रोको करण्याचा इसारा  रायगड जि. प. सदस्य अमित जाधव व पनवेल पं. स. सदस्य भूपेंद्र पाटील यांनी पनवेल सा. बां. विभागाच्या उपअभियंत्यांना दिलेल्या पत्रकात दिला आहे.