रायगडात महायुतीच्या चक्रीवादळात महाआघाडीची वाताहत!

Pravin Gaikar 27th October 2019 महत्वाच्या बातम्या, संपादकीय Leave a comment 736 Views

कोकण किनारपट्टीवरील रायगड जिल्ह्याला वादळे नवी नाहीत. पावसाळ्यात जिल्ह्यामध्ये अनेकदा वावटळी उठतात. यंदा सोसाट्याच्या वार्‍यासह अतिवृष्टीने थैमान घातले. अगदी दिवाळी आली तरी वादळ आणि पाऊस कायम आहे. अशातच जिल्ह्यातील मतदारांनी विधानसभा निवडणुकीत प्रस्थापित पक्षांना विशेषतः शेतकरी कामगार पक्षाला अक्षरशः झोडपून काढले. भाजप, शिवसेना, रिपाइं व मित्रपक्ष महायुतीच्या चक्रीवादळात शेकाप, राष्ट्रवादी काँग्रेस, काँग्रेस महाआघाडीची पुरती वाताहत झाल्याचे चित्र आहे.

अलिबागेत महेंद्र दळवी ठरले ‘जाएंट किलर’

जिल्ह्याचे मुख्यालय आणि शेकापचा बालेकिल्ला असलेल्या अलिबाग मतदारसंघात अपेक्षेप्रमाणे शिवसेनेचे महेंद्र दळवी निवडून आले. त्यांनी विद्यमान आमदार सुभाष ऊर्फ पंडित पाटील यांना दुसर्‍या प्रयत्नात पराभवाची धूळ चारली. या मतदारसंघात 70 वर्षांच्या इतिहासात शेकापचा केवळ चारदाच पराभव झाला तोही काँग्रेसकडून. या वेळी शिवसेनेचे उमेदवार दळवी ‘जाएंट किलर’ ठरले. प्रकल्पांना विरोध, स्थानिक प्रश्नांकडे दुर्लक्ष, युवकांना रोजगार मिळवून देण्यात अपयश आदी कारणांमुळे अलिबागमधील लोक शेकापवर नाराज होते. येथे शेकापने काँग्रेससोबत मैत्रीपूर्ण लढत देत ती मते दळवींकडे वळू नये अशी तजवीज केली होती, मात्र ही खेळी शेकापच्याच अंगलट आली. काँग्रेस उमेदवार श्रद्धा ठाकूर पाचव्या क्रमांकावर फेकल्या गेल्या. त्यांच्यापेक्षा जास्त मते एका अपक्ष उमेदवाराने घेतली, तर काँग्रेसमधून बंडखोरी केलेले राजा ठाकूर तिसर्‍या स्थानी राहिले. तेही विशेष मते मिळवू शकले नाहीत. दुसरीकडे भाजपने आपली संपूर्ण ताकद दळवी यांच्या पाठीशी उभी केली. त्यामुळे ते पाचएक हजार मतांनी विजयी होतील, असा कयास पत्रकारांमधून बांधला जात होता. प्रत्यक्षात दळवी 32 हजार 924 एवढ्या मतांनी विजयी झाले. यावरून अलिबागच्या जनतेने परिवर्तन करायचे ठरविले होते, हे स्पष्ट होते.