संपकरी डॉक्टरांचा संप अखेर मागे

अलिबाग : प्रतिनिधी

ग्रामीण रुग्णालय, उपजिल्हा रुग्णालय, जिल्हा रुग्णालय या ठिकाणी राष्ट्रीय आरोग्य अभियान अंतर्गत नेमण्यात आलेल्या तज्ज्ञांचे मानधन शासनाकडून वेळेत न दिल्याने डॉक्टरांनी संप पुकारला होता. जिल्हाधिकार्‍यांच्या आश्वासनानंतर हा संप मागे घेण्यात आला आहे.यासंदर्भात जिल्हाधिकारी कार्यालयात जिल्हाधिकारी डॉ. विजय सूर्यवंशी यांच्या अध्यक्षतेखाली बैठक घेण्यात आली. बैठकीत जिल्हा शल्यचिकित्सक डॉ. अजित गवळी व संप पुकारलेले डॉक्टर उपस्थित होते. जिल्हाधिकार्‍यांनी संपकरी डॉक्टरांचे मानधन लवकरच देण्यात येईल, असे आश्वासन दिले. त्यानंतर डॉक्टरांनी संप मागे घेतला असून, तत्काळ कामावर हजर होण्याचे निर्देश मान्य केले आहेत.