पंढरपुरात पालखी मार्गाचे भूमिपूजन; पंतप्रधान मोदींची ऑनलाइन उपस्थिती

पंढरपूर : प्रतिनिधी
पंढरपूरला जोडणार्‍या सुमारे 225 किलोमीटर लांबीच्या पालखी मार्गाचे केंद्रीय मंत्री नितीन गडकरी, राज्यपाल भगतसिंग कोश्यारी, मुख्यमंत्री उद्धव ठाकरे, केंद्रीय मंत्री नारायण राणे, विरोधी पक्षनेते देवेंद्र फडणवीस यांच्यासह वारकर्‍यांच्या उपस्थितीत भूमिपूजन करण्यात आले. या कार्यक्रमासाठी पंतप्रधान नरेंद्र मोदी यांनी व्हिडिओ कॉन्फरन्सिंग स्वरूपात उपस्थिती लावली. या वेळी पंतप्रधान मोदींनी ‘माझे माहेर पंढरी, आहे भिवरेच्या तीरी’ या ओळींचा जयघोष करत उपस्थितांना संबोधित केले. या पालखी मार्गामुळे भगवान विठ्ठलाच्या सेवेसोबतच, विकासालादेखील चालना मिळणार असल्याचे मोदींनी सांगितले. पंढरपूरला जोडणार्‍या या महामार्गासाठी प्रयत्न करणार्‍या सर्वांचे अभिनंदन करतो, असेही ते म्हणाले.