भाजपची नवी मुंबईत तिरंगा रॅली

नवी मुंबई : बातमीदार

भाजप नवी मुंबई अध्यक्ष रामचंद्र घरत व बेलापूर विधानसभा आमदार मंदा म्हात्रे यांनी तुर्भे येथे हरघर तिरंगा अभियानाच्या प्रचारार्थ रॅलीचे आयोजन केले होते. तसेच प्रभाग क्रमांक 25मधील एसएससी बोर्डातील गुणवंत विद्यार्थ्यांचा सत्कार या वेळी करण्यात आला. हरघर तिरंगा मोहीम घराघरात पोहोचली आहे. देशाला 13 ते 15 ऑगस्ट या कालावधीत घरोघरी फडकविलेला ध्वज पाळण्याचे आवाहन केले जात असताना, नवी मुंबईचे भाजप अध्यक्ष रामचंद्र घरत आणि आमदार मंदा म्हात्रे यांनी तिरंगा फडकविण्याचे महत्त्व सांगण्यासाठी भव्य रॅली काढली. या कार्यक्रमादरम्यान प्रभाग क्र. 25मधून एसएससी बोर्डाच्या परीक्षेत 80 टक्केपेक्षा जास्त गुण मिळविणार्‍या 25 गुणवंत विद्यार्थ्यांचा रामचंद्र घरत यांच्या हस्ते सत्कार करण्यात आला. त्यांना बॅग, ड्रेस आणि छत्रीसह उच्च शिक्षणासाठी पुस्तके निधीसाठी रोख भेट देण्यात आली. रॅलीत भाजपचे 400 पेक्षा अधिक सदस्य आणि संपूर्ण नवी मुंबईतील भाजपचे अनेकजण सामील झाले होते. रॅलीत माजी तुर्भे सरपंच डी. डी. घरत, भाजप महिला मोर्चा अध्यक्षा दुर्गा डोके, युवा मोर्चा अध्यक्ष दत्ता घंगाळे, सरचिटणीस कृष्णा पाटील, उपाध्यक्ष संकेत डोके व राजाराम पाटील, उत्तर भारतीय आघाडीचे अध्यक्ष राजेश राय, तुर्भे मंडल अध्यक्ष सुरेश अहिवले, ओबीसी जिल्हाध्यक्ष राजेश पाटील, तुर्भे वॉर्ड अध्यक्ष नारायण पाटील आदी मोठ्या संख्येने उपस्थित होते.