नवी मुंबईत कोरोना रुग्ण वाढले नियमाचे पालन करण्याचे आवाहन

नवी मुंबई : रामप्रहर वृत्त
नवी मुंबई शहरात कोरोनाबाधितांची संख्या दिवसाला 30 ते 40 च्या दरम्यान येऊ लागली असून करोनाबाधितांनी काळजीपूर्वक रित्या 5 दिवसाच्या विलगीकरणात राहण्याचे आवाहन पालिकेने केले आहे.
दिवसेंदिवस कोरोना रुग्णांची संख्या वाढत आहे. त्यामुळे करोना रुग्णांची वाढती संख्या पाहता करोना विषाणूच्या प्रसाराला रोखण्यासाठी तपासणी, विलगीकरण व उपचार या त्रिसूत्रीच्या अनुषंगाने कार्यवाहीचे निर्देश पालिका आयुक्तांनी आढावा बैठकीत दिले होते. त्यानुसार करोना चाचण्यांमध्ये वाढ करण्याकडे विशेष लक्ष देण्यात आले असून सरासरी दिवसाला 2 हजार चाचण्या केल्या जात आहेत.
नवी मुंबई शहरात सर्दी, खोकला व तापावरील उपचारासाठी महानगरपालिकेच्या रुग्णालयात अथवा नागरी आरोग्य केंद्रात येणा-या लक्षणे असलेल्या आजारी व्यक्तींची करोना चाचणी करण्यात येत असून आयएलआर आणि सारी रुग्णांचीही करोना चाचणी करण्यात येत आहे. पालिका क्षेत्रातील नवी मुंबई महानगरपालिकेची 23 प्राथमिक नागरी आरोग्य केंद्रे व 4 रुग्णालये या ठिकाणी करोना चाचण्या केल्या जात असून नेरुळ येथील माँसाहेब मिनाताई ठाकरे रुग्णालयातील आरटी-पीसीआर प्रयोगशाळा 24 तास पूर्ण क्षमतेने कार्यांन्वित आहे. या ठिकाणाहून आरटी-पीसीआर टेस्टचे रिपोर्ट 24 तासाच्या आत संबधित व्यक्तीस एसएमएस संदेशाव्दारे लिंक पाठवून उपलब्ध करून दिले जात असून करोना चाचणी सकारात्मक येणार्‍यां रुग्णांना 5 दिवसांचे गृहविलगीकरण सूचित करण्यात आले आहे.
करोना रुग्ण्संख्येची आसपासच्या शहरात वेगाने होणारी वाढ लक्षात घेता नवी मुंबई महानगरपालिकेच्या संपूर्ण आरोग्य यंत्रणेने सतर्कता राखण्याची गरज लक्षात घ्यावी आणि टेस्टींगवर भर द्यावा व करोना प्रतिबंधात्मक पावले उचलावीत असे निर्देश सर्व वैदयकिय अधिका-यांना देतानाच नागरिकांनीही करोना प्रतिबंधात्मक नियमांचे विशेषत्वाने गर्दीच्या ठिकाणी व रुग्णालयात जाताना पालन करावे असे आवाहन महापालिका आयुक्त राजेश नार्वेकर यांनी केले आहे.