नागाव बीच झाला चकाचक

ग्रामपंचायतीच्या स्तुत्य उपक्रमातून विद्यार्थ्यांनी केले श्रमदान

रेवदंडा ः प्रतिनिधी

नागाव ग्रामपंचायतीच्या स्तुत्य उपक्रमातून अलिबाग वनखात्याच्या सहकार्याने नागाव समुद्रकिनारी व सुरूबन स्वच्छता अभियान नागाव हायस्कूलच्या विद्यार्थ्यांच्या श्रमदानातून संपन्न झाले. शनिवारी नागाव ग्रामपंचायतीच्या वतीने नागाव समुद्रकिनारी व सुरू बनात स्वच्छता अभियान राबविण्यात आले होते. नागाव ग्रामपंचायत सरपंच निखिल मयेकर तसेच ग्रामपंचायत सदस्य व ग्रामपंचायत कर्मचारी यांच्यासह अलिबाग वनखात्याचे अधिकारी या स्वच्छता अभियानास उपस्थित होते. नागाव हायस्कूलच्या असंख्य विद्यार्थ्यांनी नागाव बीच चकाचक करण्यासाठी बहुमूल्य श्रमदान केले.

नागाव समुद्रकिनारा व सुरूबन पर्यटकांसाठी विशेष आकर्षण आहे. नित्याने मोठ्या संख्येने नागाव समुद्रकिनार्‍यास व सुरूबनास पर्यटक भेटी देतात. नागाव ग्रामपंचायत नागाव समुद्रकिनारा व सुरूबनाची स्वच्छता राखण्यासाठी विविध स्तुत्य उपक्रम राबवत असते. त्यामधून नागाव सरपंच निखिल मयेकर यांनी नागाव ग्रामस्थ व विद्यार्थ्यांना नागाव समुद्रकिनारा व सुरूबन स्वच्छता अभियानात सहभागी होण्याचे आवाहन केले. नागाव समुद्रकिनारा व सुरूबन स्वच्छता अभियानाचे नियोजन ग्रा.प. सदस्या हर्षदा मयेकर यांनी केले होते. या वेळी नागाव ग्रामपंचायतीचे सर्व ग्रामपंचायत सदस्य व सदस्या तसेच कर्मचारीवर्ग यांनी या नागाव समुद्रकिनारा व सुरूबन स्वच्छता अभियानात सहभाग घेतला होता.

सकाळी साडेआठ वाजता नागाव समुद्रकिनारा व सुरूबन स्वच्छता अभियानास सुरुवात करण्यात आली. या वेळी सरपंच निखिल मयेकर यांच्यासह नागाव ग्रामंचायत सदस्य व सदस्या, ग्रामपंचायत कर्मचारीवर्ग व नागाव हायस्कूलच्या विद्यार्थ्यांनी हातात फावडी, घमेले तसेच टोपली आदी स्वच्छतेसाठीचे साहित्य घेऊन श्रमदान केले.