ठरलं! रणजितसिंह नाईक-निंबाळकर माढ्यातून लढणार

नवी दिल्ली : वृत्तसंस्था

माढा लोकसभा मतदारसंघातील उमेदवारीवरून भाजपमध्ये सुरू असलेला खल अखेर पूर्ण झाला आहे. काँग्रेसला सोडचिठ्ठी देत भाजपमध्ये दाखल झालेले रणजितसिंह नाईक-निंबाळकर यांना भाजपने माढ्यातून उमेदवारी दिली आहे. त्यामुळे माढ्यात राष्ट्रवादीचे संजय शिंदे विरुद्ध नाईक-निंबाळकर असा सामना रंगणार आहे. सातारा जिल्हा काँग्रेसचे अध्यक्ष रणजितसिंह नाईक-निंबाळकर यांनी काँग्रेसला सोडचिठ्ठी देत मुख्यमंत्री देवेंद्र फडणवीस यांच्या उपस्थितीत भाजपमध्ये प्रवेश केला होता. बारामतीशी संघर्ष झाल्यानेच काँग्रेसमधून बाहेर पडत असल्याचे त्यांनी म्हटले होते, मात्र रणजितसिंह नाईक-निंबाळकर यांना भाजपकडून माढ्यातील उमेदवारी घोषित करण्यात आली नव्हती. भाजपकडून माढ्यासाठी रोहन देशमुख यांच्या नावाचाही विचार सुरू होता, मात्र संजय शिंदे यांना टक्कर देण्यासाठी भाजपने नाईक-निंबाळकर यांच्या नावावर शिक्कामोर्तब केले. त्यामुळे माढ्याची लढत रंगतदार ठरणार असल्याचे राजकीय निरीक्षकांचे म्हणणे आहे.