दुचाकीस्वारांचा जीव टांगणीला, पावसात मोठ्या अपघाताची शक्यता

रसायनी : प्रतिनिधी

राष्ट्रीय महामार्ग क्र. 4 जुना मुंबई-पुणे रस्त्यावर दांडफाटा ते खालापूर दरम्यान अनेक ठिकाणी धोकादायक रस्ता असून दुचाकी वाहनचालकांचा जीव टांगणीला लागला आहे. याची सूचना देऊन देखील आयआरबी दखल घेताना दिसत नाही.

राष्ट्रीय महामार्ग क्र. 4 म्हणजेच जुना मुंबई-पुणे महामार्गाची देखभाल दुरुस्ती आयआरबीकडे आहे. त्याबदल्यात शेडुंग येथे टोलवसुली नाका आहे. या महामार्गावर दांडफाटा ते खालापूर दरम्यान अनेक ठिकाणी धोकादायक रस्ता व वळणे आहेत.दुचाकी वाहनचालक अपघाताने पडल्यास तो सापडणार देखील नाही, अशी ठिकाणे असून देखील त्याच्याकडे गंभीरपणे पाहिले जात नाही. याबाबत त्यांना या हमरस्त्यावर भेटल्यावर काही सूचना केली असता त्याची दाद न घेता पुणे येथील मुख्य कार्यालयात लेखी कळविण्याची सूचना करतात व मुख्य कार्यालयातून सूचना आल्यावर काम करण्यात येईल, असे उत्तर मिळते. ज्या ठिकाणी साईडपट्टी नाही तिथे मोठे गट्टू उभे करणे गरजेचे आहे. जे गट्टू रस्त्याखाली गेलेत त्यांना वर उचलून रिफ्लेक्टर बसविणे व रंग लावणे आवश्यक आहे. साईडपट्टी तयार करण्यात यावी.