छात्रभारतीकडून मजुरांना मदतीचा हात

मोहोपाडा ः प्रतिनिधी

कोरोनाच्या पार्श्वभूमीवर लागू झालेल्या लॉकडाऊनमुळे मजुरांच्या हाताला काम नसल्यामुळे त्यांच्या कुटुंबातील सदस्यांची उपासमार होऊ नये यासाठी छात्रभारती पुढे येऊन काम करीत आहे. मोहोपाडा (नवीन पोसरी) येथे आतापर्यंत छात्रभारतीच्या वतीने 30 कष्टकरी मजुरांना व कुटुंबीयांना 218 किलो तांदूळ, 218 किलो आटा, 90 लिटर तेल, 70 किलो डाळ, 60 किलो बटाटे, 34 किलो कांदे, 25 किलो मीठ आदी अन्नधान्याचे वाटप करण्यात आले. या वेळी रायगड छात्रभारतीचे जितेश किर्दकुडे, मिहीर दोषी आणि शिक्षक भारतीचे मंदार वेदक यांनी शासनाचे नियम काटेकोरपणे पाळत रसायनी विभागातील गोरगरीब कुटुंबांना किराना सामानाचे वाटप केले.