युवाशक्तीची मते निर्णायक ठरणार

पेण विधानसभा मतदारसंघात 18 ते 39 वयोगटात 1 लाख 30 हजार 810 मतदार

पेण : अनिस मनियार

रायगड लोकसभा मतदारसंघात उमेदवारांना विजयाची निर्णायक आघाडी मिळवुन देणारा विधानसभा मतदारसंघ म्हणून पेणचा उल्लेख केला जातो.

पेण विधानसभा मतदारसंघात 1 लाख 30 हजार 810 युवा मतदार असून, या युवाशक्तीचे प्रत्येक निवडणुकीत 100 टक्के मतदान होते. त्यामुळे युती व आघाडयांच्या उमेदवारांना आपल्या बाजूस हे मतदान वळवण्यासाठी येत्या 12 दिवसात प्रचंड मेहनत घ्यावी लागेल.

पेण विधानसभा मतदारसंघात एकुण 3 लाख 76 मतदार असून यामध्ये 1 लाख 51 हजार 421 पुरूष तर 1 लाख 48 हजार 655 महिला मतदार आहेत. त्यात 18 ते 39 वयोगटातील युवा मतदारांची संख्या 1 लाख 30 हजार 810 घरात आहे.

पेण विधानसभा मतदार संघात 48 टक्के महिला मतदार आहेत. महिला वर्ग नेहमी प्रामाणिक व कसोशीने मतदान करतो. पेणमधील महिला मतदारांचे मतदान ज्याला पडेल तो उमेदवार काही अंशी भाग्यवान ठरणार आहे.

पेण विधानसभा मतदारसंघात 375 मतदान केंद्र असून, यामध्ये पेण तालुक्यातील 208, पाली-सुधागड तालुक्यामधील 80, तर रोहा तालुक्यातील 87 केंद्रांचा समावेश आहे.