पनवेल तालुक्यातील पाणीपुरवठा सुरळीत न झाल्यास आंदोलन करणार

आमदार प्रशांत ठाकूर यांचा अधिकार्‍यांना इशारा

पनवेल ः रामप्रहर वृत्त
पनवेल तालुक्याच्या ग्रामीण भागातील पाणीटंचाईच्या पार्श्वभूमीवर आमदार प्रशांत ठाकूर यांनी गुरुवारी (दि. 15) पनवेल पंचायत समितीमध्ये महाराष्ट्र जीवन प्राधिकरण, महाराष्ट्र औद्योगिक विकास महामंडळ आणि पंचायत समितीच्या अधिकार्‍यांसोबत तातडीची बैठक आयोजित केली होती. या बैठकीत आमदार ठाकूर यांनी पाणीपुरवठा सुरळीत करण्यासाठी तातडीने उपाययोजना करण्याचे निर्देश दिले तसेच कार्यवाही न झाल्यास मोठे आंदोलन उभारण्याचा इशारा अधिकार्‍यांना दिला.
आमदार प्रशांत ठाकूर यांच्या उपस्थितीत झालेल्या या बैठकीत त्यांनी एमजेपी, एमआयडीसी आणि पंचायत समितीच्या अधिकार्‍यांची पाणीप्रश्नी कानउघाडणी केली. ग्रामीण भागातील जनतेला पुरेसे पाणी मिळत नसेल, तर या संदर्भात मोठे आंदोलन उभे केले जाईल, अशा शब्दांत त्यांनी अधिकार्‍यांना सुनावले तसेच या गंभीर परिस्थितीची दखल घेत लवकरच ग्रामविकासमंत्र्यांकडे याबाबत बैठकीचे आयोजन करण्यात येणार असल्याचे सांगत अधिकार्‍यांनी लक्ष घालून पाठपुरावा करण्याची सूचना केली.
या बैठकीला भाजपचे ज्येष्ठ नेते अरुणशेठ भगत यांच्यासह पंचायत समिती, एमजेपी आणि एमआयडीसीचे अधिकारी तसेच ग्रामपंचायतींचे सरपंच उपस्थित होते.