खोपोलीतील सार्वजनिक शौचालयांची होणार दुरुस्ती

खोपोली ः प्रतिनिधी

खोपोली नगरपालिकेकडून स्वच्छता अभियानाच्या पार्श्वभूमीवर विविध उपक्रम सुरू आहेत. या मोहिमेंतर्गत शहरातील सार्वजनिक स्वच्छतागृह व शौचालयांची दुरुस्ती करण्याची मोहीम राबविण्यात येणार आहे. यासंबंधी दोन दिवसांपूर्वी मुख्याधिकारी गणेश शेटे यांनी अधिकार्‍यांच्या उपस्थितीत शौचालयांची पाहणी करून कामांच्या सूचना दिल्या.

खोपोली नगरपालिका क्षेत्रातील सार्वजनिक शौचालय व स्वच्छतागृहांमधील असुविधांबाबत नागरिकांच्या तक्रारी आहेत. नगरपालिकेकडून स्वच्छता अभियान जोरदारपणे राबविण्यात येत आहे. याअंतर्गत स्वच्छतेसंबंधी अनेक उपाययोजना व जनजागृतीची मोहीम सुरू आहे. या मोहिमेंतर्गत प्राप्त निधीतून सार्वजनिक शौचालय व स्वच्छतागृहांची दुरुस्ती व डागडुजीही करण्यात येणार आहे. याबाबत मुख्याधिकारी गणेश शेटे यांनी संबंधित विभागातील अधिकार्‍यांसोबत विशेष पाहणी करून  लवकरात लवकर प्रस्तावित कामांचा आराखडा तयार करून कामे पूर्णत्वास आणण्याच्या सूचना प्रशासनाला केल्या.