‘रयत’च्या अध्यक्षपदी शरद पवारांची फेरनिवड; सचिवपदी प्राचार्य विठ्ठल शिवणकर

सातारा : प्रतिनिधी

सर्वांना शिक्षणाची समान संधी मिळावी, या हेतूने प्रेरित होऊन स्थापन झालेल्या आणि राज्यासह कर्नाटक राज्यात शाखा विस्तार असलेल्या सातार्‍याच्या रयत शिक्षण संस्थेच्या अध्यक्षपदी शरद पवार आणि चेअरमनपदी डॉ. अनिल पाटील यांची शनिवारी

(दि. 27) फेरनिवड झाली, तर संस्थेचे सचिव म्हणून वाशी (नवी मुंबई) येथील डॉ. कर्मवीर भाऊराव पाटील महाविद्यालयाचे प्राचार्य डॉ. विठ्ठल शिवणकर यांची निवड झाली आहे.

लॉकडाऊन शिथिलीकरणानंतर रयत शिक्षण संस्थेच्या सर्वसाधारण समितीची महत्त्वपूर्ण बैठक शनिवारी सातारा येथे शरद पवार यांच्या अध्यक्षतेखाली झाली. जिल्हा परिषदेच्या यशवंतराव चव्हाण सभागृहात झालेल्या या बैठकीत नूतन पदाधिकार्‍यांच्या निवडी झाल्या. या बैठकीस उपमुख्यमंत्री अजित पवार, मॅनेजिंग कौन्सिल सदस्य माजी खासदार लोकनेते रामशेठ ठाकूर, दिलीप वळसे-पाटील, विश्वजित कदम, हणमंतराव गायकवाड आदी मान्यवर उपस्थित होते.

या वेळी संस्थेच्या उपाध्यक्षपदी आमदार चेतन तुपे, जयश्री चौगुले, गणपतराव देशमुख, अरुण कडू आणि एन. डी. पाटील यांची निवड करण्यात आली. ’रयत’च्या पदाधिकार्‍यांची आगामी तीन वर्षांसाठी ही निवड करण्यात आल्याचे संस्थेकडून सांगण्यात आले. कर्मवीर पुण्यतिथी दिवशी म्हणजेच 9 मे रोजी या निवडी केल्या जातात. सातारा जिल्हा कोरोनाचा हॉटस्पॉट असण्याचा तो काळ असल्याने त्या वेळी पदाधिकार्‍यांच्या निवडी पुढे ढकलण्यात आल्या होत्या. त्या आजच्या बैठकीत करण्यात आल्या. या बैठकीस डॉ. अनिल पाटील यांच्यासह पदाधिकारी व सदस्य उपस्थित होते.