वेगाने वाहन चालविणार्यांना दणका

महामार्ग पोलीस केंद्र पळस्पेकडून 10115 वाहनांवर कारवाई

पनवेल : वार्ताहर

मुंबई-पुणे द्रुतगती मार्गावर होणार्‍या अपघातांचे मुख्य कारण हे वेग मर्यादेचे उल्लंघन असल्याचे निष्पन्न झाल्याने विहीत मर्यादेपेक्षा अधिक वेगाने वाहन चालविणार्‍या 10115 वाहनांवर कारवाई करण्यात आली. राज्यातील महामार्गांवर अपघाताचे प्रमाण कमी व्हावे याकरीता पळस्पे पोलीस मदत केंद्राकडील अधिकारी कर्मचारी यांनी कंबर कसली आहे.

भुषण उपाध्याय अप्पर पोलीस महासंचालक वाहतुक महाराष्ट्र राज्य मुंबई, यांनी दिलेल्या सुचनांप्रमाणे विजय पाटील, पोलीस अधीक्षक (मुख्यालय) व डॉ. दिगंबर प्रधान, पोलीस अधीक्षक महामार्ग पोलीस ठाणे परिक्षेत्र ठाणे तसेच सुदाम पाचोरकर पोलीस निरीक्षक यांचे मार्गदर्शनाखाली सहाय्यक पोलीस निरीक्षक सुभाष पुजारी ही कारवाई करण्यात येत आहे.

अप्पर पोलीस महासंचालक भुषण उपाध्याय यांचे आदेशाप्रमाणे चालकांचे प्रबोधन व बेशिस्त चालकांवर कारवाई अशी विशेष मोहिम हाती घेण्यात आली आहे. या मोहिमेअंतर्गत माहे सप्टेंबर 2020 मध्ये इंटरसेप्टर वाहनादवारे व मुंबई पुणे द्रुतगती मार्गावर वेगवेगळया ठिकाणी बसविण्यात आलेल्या सीसीटीव्ही कॅमेरामार्फत अतिवेगाने वाहन चालविणार्‍या 10115 वाहनांवर कारवाई करण्यात आली व सीट बेल्ट न लावणे, मोबाइल संभाषण, लेन कटींग, काळ्या काचा, रिफलेक्टर नसलेल्या 8010 वाहनांवर अशा एकूण 18125 वाहनांवर कारवाई करण्यात आली.

महामार्ग पोलीस केंद्र पळस्पे कडुन अपघात कमी व्हावे तसेच वाहनचालकांमध्ये वाहतुक नियम व नियमनाबाबत जनजागृती व्हावी याकरीता वेळोवेळी चौकसभा आयोजीत करुन वाहन पर्किंग स्थळे, कळंबोली ट्रक टर्मीनल, लॉजीस्टीक्स येथे कार्यकम घेवुन वाहतुक नियमांबाबतच्या माहितीबाबतची पत्रके वाटण्यात येतात तसेच वाहतुक नियंमांचे उल्लंघन केल्यामुळे होणार्‍या अपघाताबाबत माहिती देऊन अपघातसमयी मदत करण्याबाबत सुचना करण्यात येतात. वाहतूक नियमांचे उल्लंघन केल्यास करण्यात येणार्‍या दंडात्म्क कारवाईबाबतची माहिती देऊन वाहनचालकांचे प्रबोधन करण्यात येत असते असे महामार्ग पोलीस केंद्र पळस्पेचे सहा.पोलीस निरीक्षक सुभाष पुजारी यांनी सांगितले.