संसर्गजन्य आजारांवरील रुग्णालयाची नवी मुंबईत गरज

नवी मुंबई : रामप्रहर वृत्त – स्मार्ट सिटी म्हणून ओळख असणार्‍या नवी मुंबईमध्ये कायमस्वरूपी संसर्गजन्य आजारांवर उपचार करणारे रुग्णालय नाही ही अत्यंत खेदाची बाब आहे. कारण भविष्यात कोरोनासारख्या इतर संसर्गजन्य आजारांचा सामना करण्यासाठी शहरामध्ये या संसर्गावर उपचारासाठी रुग्णालय असणे गरजेचे आहे. शहरात कोरोनाप्रमाणेच इतरही संसर्गजन्य आजाराचे रुग्ण वर्षानुवर्षे आढळत आहेत. त्यांच्यावर उपचारासाठी स्वतंत्र रुग्णालय नसल्याने वाशीतील प्रथमसंदर्भ रुग्णालयातच उपचार घेतले जातात.

सध्या कोरोना या संसर्गजन्य आजाराने जगभरात थैमान घातले आहे. नवी मुंबईत त्याचा प्रभाव अधिक प्रमाणात दिसून आला आहे. परिणामी 50 हजार जणांहून अधिकांना कोरोनाचा संसर्ग झाला असून त्यात एक हजार 28 जणांचा मृत्यू झाला आहे. कोरोनाबाधित रुग्णांवर उपचारांसाठी पालिकेने वेळीच हालचाली करत उभारलेल्या केंद्रांमुळे मागील एक महिन्यापासून कोरोना रुग्णांची संख्या बर्‍यापैकी नियंत्रणात आली आहे. मात्र भविष्यात इतर संसर्गजन्य आजारांचा धोका उद्भवण्याची शक्यता नाकारता येत नाही. यापूर्वी स्वाईन फ्लयू, कुष्ठरोग, प्लेग अशा आजारांच्या लाटा येऊन गेलेल्या आहेत. तर हिवताप, कांजण्या, क्षयरोग या संसर्गजन आजाराचे रुग्ण अद्यापही काही प्रमाणात आहेत. कोरोनापासून मिळालेल्या धड्यामुळे भविष्यात स्वतंत्र रुग्णालयाची आवश्यकता भासत आहे.

प्रशासनाने स्वतंत्र संसर्गजन्य आजारांवरील रुग्णालय उभारायचे ठरवल्यास नागरी लोकवस्तीबाहेर सीबीडी सेक्टर 8 येथे पालिकेच्या मालकीचा भूखंड उपयुक्त ठरू शकतो. हा भूखंड क्षयरोग केंद्रासाठी मिळाला असून अद्याप त्याचा वापर झालेला नाही. अथवा पालिकेचीच वापरात नसलेली एखादी वास्तू असे रुग्णालय उभारणीसाठी उपयोगी ठरू शकते.

आरोग्याची आणीबाणी उद्भवण्याचा धोका

सध्या मुंबईत कस्तुरबा रुग्णालयात संसर्गजन्य आजारांवर उपचारांची स्वतंत्र यंत्रणा आहे. त्याचप्रमाणे नवी मुंबई पालिका शहरात संसर्गजन्य रुग्णालय उभारण्यासाठी पाऊल उचलणे काळाची गरज बनले आहे. कीटकजन्य रोग, हवेद्वारे पसरणारे रोग व पाण्याद्वारे पसरणारे रोग अशा तीन वर्गात संसर्गजन्य आजारांचे वर्गीकरण होते. शहरात दाटीची लोकसंख्या असलेल्या भागात या तीनही मार्गाने संसर्ग पसरल्यास आरोग्याची आणीबाणी उद्भवू शकते.