कशेडी घाटात पुन्हा दरड कोसळली

धामणदिवी येथे महामार्गावर लाल मातीचे ढिगारे

पोलादपूर : प्रतिनिधी

मुंबई-गोवा महामार्गावरील धामणदिवी गावाच्या हद्दीत मंगळवारी (दि. 5) सायंकाळी दरड कोसळण्याची घटना घडली. त्यामुळे कशेडी घाटातील वाहतूक एका मार्गिकेवरून सुरू होती. दरड हटविण्याचे काम हाती घेण्यात आले असल्याची माहिती कशेडी टेप वाहतूक पोलीस कक्षाचे उपनिरीक्षक चांदणे यांनी दिली.

कशेडी घाटात सोमवारी दुपारी चोळई गावाच्या हद्दीत दरड कोसळली होती. त्यानंतर मंगळवारी सलग दुसर्‍या दिवशी धामणदिवी येथे दरड कोसळल्याने प्रशासनाची तारांबळ उडाली. कशेडी घाटातील वाहतूक सुरळीत ठेवण्यासाठी निकाराचे प्रयत्न सुरू असल्याचे या वेळी प्रशासनाकडून सांगण्यात आले.