मुरूड ः कोरोनाच्या पार्श्वभूमीवर जारी असलेल्या लॉकडाऊनमुळे मुरूड एसटी आगारदेखील महिनाभरापासून बंद आहे. या बंदच्या काळात गाड्यांच्या मेंटेनन्सचा प्रमुख प्रश्न उद्भवतो. जर गाडी चार दिवस बंद ठेवली तर बॅटरी उतरण्याची शक्यता असते व गाडी महिनाभर चालूच केली नाही तर बॅटरी नादुरुस्त होते. तसेच इंजीनमधील ऑइल घट्ट होऊन वाहन नादुरुस्त होते. त्यामुळे मुरूड आगारातील तीन टक्के कामगार सध्या आगारात येऊन प्रत्यक्ष गाडी चालू करतात व बॅटरी चार्ज तसेच आलटून पालटून सर्व गाड्यांच्या दुरुस्तीचे काम सातत्याने सुरू आहे. ज्या दिवशी लॉकडाऊन संपेल त्या दिवशी प्रवाशांना गाड्या सुसज्ज मिळतील.