कासाडी नदी प्रदूषणाची अधिकार्‍यांकडून पाहणी

कळंबोली : प्रतिनिधी

तळोजा औद्योगिक क्षेत्रातील कासाडी नदीत सोमवारी (दि. 29) पहाटे विघातक विषारी पाणी सोडल्याने कानपोली पुलाखाली पाण्याला लाल रंग आला होता. त्यामुळे परिसरातील नागरिकांमध्ये भीतीचे वातावरण पसरले आहे. याची दखल घेत प्रदूषण नियंत्रण महामंडळाने दुसर्‍याच दिवशी पाहणी केली, मात्र संबंधित रसायन हे कानपोली पुलाच्या खाली असल्याने ते क्षेत्र एमआयडीसी हद्दीत येत नसल्याचे या वेळी अधिकार्‍यांनी सांगितले. त्यामुळे आता कधी कारवाई होणार याकडे नागरिकांचे लक्ष लागले आहे.रसायनाचे नमुने घेतले आहेत. ते कोणत्या कंपनीने सोडले याची माहिती मिळवून त्यांच्यावर कडक कारवाई केली जाईल. त्याचप्रमाणे ज्या ठिकाणी कासाडी नदीत रसायन सोडले आहे तो भाग रायगड प्रदूषण नियंत्रण मंडळाच्या अखत्यारित येतो. त्यांना याबाबत कळविण्यात आले आहे, असे महाराष्ट्र प्रदूषण नियंत्रण महामंडळाचे उपप्रादेशिक अधिकारी किशोर किल्लेकर यांनी या वेळी सांगितले.