केंद्रीय मंत्री नितीन गडकरींच्या प्रयत्नामुळे महाराष्ट्राला मिळणार अधिक ऑक्सिजन

मुंबई ः प्रतिनिधी
केंद्रीय मंत्री नितीन गडकरी यांच्या पुढाकाराने आता विशाखापट्टणम येथील आयआयएनएल प्राणवायू निर्मिती प्रकल्पातून 97 मेट्रिक टन द्रव्य (लिक्विड) प्राणवायू महाराष्ट्राला मिळणार आहे. पुढील दोन दिवसांत विशाखापट्टणम येथून पुरवठा सुरू होईल. यामुळे विदर्भ व मराठवाड्याला दिलासा मिळणार आहे.
अनेक रुग्णालयांत प्राणवायूची कमतरता आहे. त्यामुळे केंद्रीय मंत्री गडकरी यांनी प्राणवायूची निर्मिती करणार्‍या विविध कंपन्यांशी चर्चा केल्यानंतर शहरात प्राणवायूचे टँकर आणि सिलेंडर उपलब्ध होत आहेत. यापूर्वी भिलाईमधून 60 टन द्रव्य प्राणवायू असलेले टँकर मागवण्यात आलेले आहेत. त्यामुळे आता दररोज 157 मेट्रिक टन प्राणवायू मिळणार आहे.
दरम्यान, प्राणवायूची मागणी बघता शहरातील 50 खाटांपेक्षा जास्त असलेल्या रुग्णालयांनी हवेतून प्राणवायूची निर्मिती करण्यासाठी प्रकल्प सुरू करावे, असे आवाहनही गडकरी यांनी केले आहे.