दिल्लीतील तरुण लोणावळ्यातील नागफणीत बेपत्ता

खोपोली ः प्रतिनिधी

लोणावळ्याजवळील कुरवंडे येथील नागफणी येथे फिरायला गेलेला दिल्ली येथील एक तरुण शुक्रवारी (दि. 20) दुपारपासून बेपत्ता झाला आहे. बेपत्ता असलेल्या तरुणाने त्याच्या भावाच्या मोबाईलवर मेसेज करून माहिती दिली, मात्र मेसेजनंतर या तरुणाचा मोबाईल बंद दर्शवित आहे. इरफान शहा (वय-24, रा.दिल्ली) असे या तरुणाचे नाव असून लोणावळा शहर पोलीस, श्वानपथक पथक, लोणावळ्यातील शिवदुर्ग मित्र व खोपोलीतील यशवंती हायकर्स ही दोन आपत्कालीन पथकेही ड्रोन कॅमेर्‍यांच्या सहाय्याने तरुणाचा शोध घेत आहेत.

लोणावळा शहर पोलिसांनी दिलेल्या माहितीनुसार, दिल्ली येथील इरफान शहा हा तरुण शुक्रवारी लोणावळ्यात एकटाच फिरायला आला होता. फिरताना तो नागफणी परिसरातील जंगलात भरकटला. इरफानला आपण भरकटला असल्याची खात्री झाल्यावर त्याने याबाबत त्याच्या भावाला मेसेज करून माहिती दिली. माहिती दिल्यानंतर इरफानचा मोबाईल बंद दर्शवित आहे. माहिती मिळाल्यानंतर इरफानच्या भावाने त्याच्या मित्राच्या मदतीने लोणावळा शहर पोलीस ठाण्याशी संपर्क साधून या घटनेची माहिती पोलिसांना दिली. लोणावळा उपविभागीय पोलीस अधिकारी राजेंद्र पाटील व लोणावळा शहर पोलीस निरीक्षक सिताराम डुबल यांनी याबाबत लोणावळ्यातील शिवदुर्ग मित्र व खोपोलीतील यशवंती हायकर्स तसेच श्वान पथकाशी संपर्क साधून शोध मोहिमेसाठी प्राचारण केले. रात्र झाल्यामुळे शोधमोहीम थांबविण्यात आली.