ड्रोनद्वारे गावठाण भूमापन झालेल्या सर्व्हेच्या सनद वाटपास खालापूर तालुक्यातील जनतेचा उत्स्फूर्त प्रतिसाद

खोपोली, खालापूर : प्रतिनिधी

जिल्हा भूमी अभिलेख कार्यालयाचे अधीक्षक सचिन इंगळी यांच्या मार्गदर्शनाखाली खालापूर तालुक्यात ड्रोनद्वारे झालेल्या गावठाण भूमापन सर्व्हेच्या सनद वाटप कार्यक्रमास तालुक्यातील जनतेचा उत्स्फूर्त प्रतिसाद मिळाला. केंद्र शासनाच्या स्वामित्व योजनेंतर्गत महाराष्ट्रातील सर्व गावाचे गावठाण सर्वेक्षण करण्याचा महत्वपूर्ण निर्णय राज्य शासनाच्या ग्रामविकास खात्यांतर्गत घेण्यात आला. त्यानुसार भूमी अभिलेख विभागाच्या पुढाकाराने महसूल विभाग व ग्रामविकास विभाग यांच्या संयुक्त विद्यमाने खालापूर तालुक्यातील एकूण 153 गावे व वाड्यांपैकी गावठाण भूमापन न झालेले 103 गावांची अत्याधुनिक ड्रोनद्वारे भारतीय सर्वेक्षण विभागामार्फत अत्यंत अचूक पद्धतीने मोजणी करण्यात आली. भारतीय सर्वेक्षण विभागाकडून मोजणी नकाशे मिळाल्यानंतर भूमी अभिलेख विभागाचे अधिकारी प्रत्यक्ष जागेवर जावून चौकशी करून संपूर्ण अभिलेख डिजिटाईज करून घेतात. त्यानंतर सर्व्हे ऑफ इंडिया मार्फत भौगोलिक माहिती प्रणालीद्वारे गावठाणातील प्रत्येक मिळकतीची सनद मिळकत पत्रिका व नकाशा तयार केले जातात. अशा पद्धतीने खालापूर येथे 103 गावांचे ड्रोन सर्वेक्षणाचे काम पूर्ण झाले असून, 45 गावांचे प्रत्यक्ष जागेवर जावून चौकशीचे कामदेखील पूर्ण झाले आहे. त्यापैकी 38 गावांच्या मिळकत पत्रिका आणि 13 गावांच्या सनद तयार झाल्या आहेत.  खालापूर तालुक्यातील विणेगाव, इसांबे, तोंडली, ढेकू, वारद, कुंभिवली या गावांचा सनद वितरण कार्यक्रम 7 सप्टेंबर रोजी आणि सारसन, लोहोप, स्वाली, पौद, केळवली या गावांच्या सनद वितरण करण्याचा कार्यक्रम 8 सप्टेंबर रोजी संबंधीत ग्रामपंचायत कार्यालयात घेण्यात आला. यावेळी संबंधित गावाचे सरपंच, ग्रामपंचायत सदस्य तसेच ग्रामसेवक यांनी उत्तम सहकार्य केले. या वेळी सरासरी 82 टक्के वसूली झाली आहे. संबंधित मिळकतधारकांकडून सनद घेण्यासाठी चांगला प्रतिसाद मिळाला. प्रत्येकाला आपल्या मालकी हक्काचा पुरावा व अभिलेख मिळाल्यामुळे जनतेने समाधान व्यक्त केले आहे. कोकण प्रदेश भूमी अभिलेखचे उपसंचालक जयंत निकम आणि रायगड जिल्हा अधीक्षक सचिन इंगळी यांच्या मार्गदर्शनाखाली खालापूर भूमी अभिलेख उपअधीक्षक शरद काळे व त्यांच्या सहकार्‍यांनी अचूक नियोजन करून ही मोहीम यशस्वी केली.