शेकाप नेते विश्वास भगत यांचा कार्यकर्त्यांसह भाजपमध्ये प्रवेश

पनवेल : रामप्रहर वृत्त
रायगड जिल्हा परिषद आणि पनवेल पंचायत समिती निवडणुकीच्या रणधुमाळीमध्ये पनवेल तालुक्यात शेतकरी कामगार पक्षाला हादरा बसला आहे. पळस्पे जिल्हा परिषद गटातील उसर्ली ग्रामपंचायतीचे माजी सरपंच व शेतकरी कामगार पक्षाचे ज्येष्ठ नेते विश्वास भगत यांनी असंख्य समर्थक व कार्यकर्त्यांसह भारतीय जनता पक्षात जाहीर प्रवेश केला आहे.
उसर्ली येथील दीप सिटी येथे कार्यसम्राट व लोकप्रिय आमदार प्रशांत ठाकूर, भाजपचे उत्तर रायगड जिल्हाध्यक्ष अविनाश कोळी, राज्य परिषद सदस्य अरुणशेठ भगत यांच्या प्रमुख उपस्थितीत हा पक्षप्रवेश सोहळा झाला. या भव्य पक्षप्रवेशामुळे पळस्पे मतदारसंघातील शेकापची संपूर्ण राजकीय घडी विस्कटली आहे.
या कार्यक्रमात शेकाप नेते विश्वास भगत यांच्यासोबत ग्रामपंचायत सदस्य संजय भगत, अर्चना भगत, माजी सरपंच करुणा भगत, हरेश्वर भगत, राकेश भगत, अमित भगत, मोहन भगत, डेरवली पंच कमिटीचे अध्यक्ष संतोष शेळके, रामदास शेळके, विविध सोसायट्यांचे पदाधिकारी आणि असंख्य शेकाप कार्यकर्त्यांनी भाजपचे ‘कमळ’ हाती घेतले.
या वेळी आमदार प्रशांत ठाकूर यांनी आपल्या भाषणात प्रकल्पग्रस्त व भूमिपुत्रांच्या घरांवर सिडकोकडून अन्याय होत असेल, तर तो कोणत्याही परिस्थितीत सहन केला जाणार नाही, असे ठामपणे सांगितले. अन्यायाविरोधात कडाडून विरोध करण्याची आमची भूमिका पूर्वीपासूनच राहिली असून त्यासाठी आम्ही व आमचे कार्यकर्ते पूर्णपणे सज्ज आहोत. वाढत्या नागरीकरणामुळे परिसरातील गावांचे स्वरूप बदलत आहे. या भागात नैना प्राधिकरण येत आहे. त्या अनुषंगाने नागरिकांच्या हिताला बाधा पोहचवणार्‍या चुकीच्या निर्णयांना कायम विरोध केला जाईल, असेही त्यांनी स्पष्ट केले.
सिडकोकडून राहत्या घरांवर प्लॉट टाकण्याचा कोणताही प्रयत्न खपवून घेतला जाणार नाही. प्रकल्पग्रस्त शेतकर्‍यांचे नैना प्रकल्पामुळे नुकसान होऊ नये यासाठी आम्ही कटिबद्ध आहोत, असे सांगत अटल सेतू व विमानतळामुळे हा परिसर थेट मुंबईशी जोडला गेला असून मुंबईपेक्षाही अधिक सुविधा या भागात उपलब्ध करून दिल्या जाणार असल्याचा विश्वास व्यक्त करत येत्या निवडणुकीत नागरिकांनी आम्हाला साथ द्यावी. भविष्यातही नागरिकांच्या हिताचे संरक्षण करण्याची जबाबदारी आम्ही पार पाडू, अशी ग्वाही आमदार प्रशांत ठाकूर यांनी दिली.
पनवेल महापालिकेचे माजी विरोधी पक्षनेते प्रितम म्हात्रे यांनी आपल्या मनोगतात शेकापच्या झालेल्या बिकट अस्वस्थेवर भाष्य केले. विश्वास भगत यांच्या भाजप प्रवेशामुळे शेकापला आता पोलिंग एजंट आणि बूथवर बसायला कार्यकर्ते मिळतील का? अशी परिस्थिती या भागात झाली आहे, असा सणसणीत टोला त्यांनी शेकापच्या पुढार्‍यांना लगावला तसेच यापुढील काळात विश्वास भगत हे आमदार प्रशांत ठाकूर यांचे खंदे कार्यकर्ते म्हणून ओळखले जाणार आहेत, असेही त्यांनी अधोरेखित केले.
या पक्षप्रवेश कार्यक्रमाला भाजपचे जिल्हा सरचिटणीस व पनवेल महापालिकेतील भाजप महायुतीचे गटनेते नितीन पाटील, माजी शहर अध्यक्ष जयंत पगडे, जिल्हा उपाध्यक्ष गणेश कडू, नगरसेवक एकनाथ गायकवाड, अजय बहिरा, महाराष्ट्र प्रदेश वाहतूक संघटनेचे अध्यक्ष प्रभूदास भोईर, माजी नगरसेवक सुनील बहिरा, प्रभाकर बहिरा, विभागीय अध्यक्ष अनेश ढवळे, जयवंत भगत, युवा मोर्चाचे जिल्हाध्यक्ष आनंद ढवळे, अतुल घरत, माजी सरपंच अतुल तांबे, मच्छिंद्र पाटील, संजय भगत, नितीन भगत, हेमंत भगत, मुकेश भगत यांच्यासह पदाधिकारी व कार्यकर्ते मोठ्या संख्येने उपस्थित होते.