नवी मुंबई महापालिका उभारणार 1200 बेडचे कोविड केअर सेंटर

आयुक्त अण्णासाहेब मिसाळ यांची निर्णय

नवी मुंबई : बातमीदार

नवी मुंबई महानगरपालिका वाशी सिडको एगजीबीशन सेंटर येथे तब्बल 1200 बेडचे कोविड केअर सेंटर उभारणार आहे. क्षेत्रातील कोरोना बाधितांची वाढती संख्या लक्षात घेऊन त्यांच्यावरील उपचाराकरिता वैद्यकीय व्यवस्थेचे सुयोग्य नियोजन करण्याच्या दृष्टीने महापालिका आयुक्त अण्णासाहेब मिसाळ यांनी हा निर्णय घेतला आहे. त्यासाठी विभागप्रमुखांची तातडीने बैठक घेत आवश्यक उपाययोजनांच्या अनुषंगाने सविस्तर चर्चा केली. केंद्रीय कुटुंब कल्याण मंत्रालय, भारत सरकार यांच्या मार्गदर्शक सूचनांनुसार कोविड केअर सेंटर, डेडीकेटेड कोविड हेल्थ सेंटर, डेडीकेटेड कोविड हॉस्पिटल अशाप्रकारे तयार करण्यात आलेल्या त्रिस्तरीय रुग्णालय व्यवस्थापनाचा सविस्तर आढावा घेतला. त्यामध्ये वाढ करण्याच्या दृष्टीने तातडीने उपाययोजना करण्यासाठी त्यांनी निर्देश दिले. तसेच तेथे दोन स्वतंत्र कक्ष असणार आहेत. यामधील एका कक्षात स्वॅब सॅम्पल टेस्ट रिपोर्ट पॉझिटिव्ह आलेल्या व सौम्य स्वरुपाची लक्षणे असलेल्या कोविड-19 बाधीतांवर स्वतंत्रपणे उपचार करण्यात येणार आहेत. तसेच  दुसर्‍या स्वतंत्र कक्षात कोरोना पॉझिटिव्ह नागरिकाच्या संपर्कात आल्यामुळे क्वारंटाइन केलेल्या संशयित नागरिकांना ठेवण्यात येणार आहे. याठिकाणी आवश्यक असलेल्या स्नानगृहे व स्वच्छतागृहांची व्यवस्था मॉड्युलर स्वरुपात त्वरित करण्याचे निर्देश आयुक्तांनी अभियांत्रिकी विभागाला दिले. त्याचप्रमाणे घणसोली येथील रिलायन्स कॉर्पोरेट आय.टी. पार्कमध्ये मेडिकल अ‍ॅण्ड ऑक्युपेशनल हेल्थ सेंटर या ठिकाणीही कोविड केअर सेंटर करिता 120 बेड्स असणार असून त्यामधील 60 बेड्स महानगरपालिका संदर्भित कोरोना संदर्भिय व्यक्तींसाठी राखीव असणार आहेत. यासोबत सेक्टर 22 नेरुळ येथील तेरणा हॉस्पिटलमध्ये पहिल्या टप्प्यात 100 बेड्सचे डेडीकेटेड कोविड हॉस्पिटल सुरु करण्यात येत असल्याचे जाहीर केले आहे.