पाणी वाचविण्यासाठी जनहित याचिका दाखल करणार

अधिकार्‍यांच्या दुर्लक्षाने लाखो लिटर पाणी वाया

पनवेल : प्रतिनिधी

पनवेल महापालिका हद्दीत पाणीटंचाई असताना नवीन पनवेलमधील सेक्टर 15मधील  शांतिवन असोसिएशनच्या बाजूने महाराष्ट्र जीवन प्राधिकरणाची गेलेली  पाण्याची पाइपलाइन अनेक ठिकाणी फुटलेली असल्याने त्या लाइनमधून 24 तासांत हजारो लिटर पाणी वाया जात आहे.  त्यामुळे 35 वर्षांपूर्वीच्या  बिल्डिंगला धोका होऊ शकतो. त्याबाबत तक्रार केली असता लक्ष द्यायला अधिकार्‍यांना वेळ नसल्याने याबाबत जनहित याचिका दाखल करण्याचा निर्णय रहिवाशांनी घेतला आहे.

 नवीन पनवेलमध्ये  सेक्टर 15मध्ये रेल्वे स्टेशनच्या बाजूला सिडकोची शांतिवन असोसिएशन आहे. या असोसिएशनच्या 10 क्रमांकाच्या बिल्डिंगच्या बाजूने महाराष्ट्र जीवन प्राधिकरणाची मोठी पाण्याची पाइपलाइन गेली आहे.  ही पाइपलाइन अनेक ठिकाणी फुटलेली असल्याने त्यामधून पाण्याचे फवारे उडत आहेत. या लाइनमधून 24 तास पाणी वाहत असते. हे पाणी सोसायटीमधील मैदानात साचून तेथे चिखल झाला आहे. पाण्याच्या दाबाने जीर्ण झालेली पाइपलाइन फुटल्यास सिडकोच्या 35  वर्षांपूर्वीच्या या बिल्डिंगला आणि तेथील रहिवाशांच्या जीवाला  धोका असल्याने याबाबत महाराष्ट्र जीवन प्राधिकरणाचे  कार्यकारी अभियंता दशोरे यांच्याकडे 22 फेब्रुवारी रोजी असोसिएशनचे अध्यक्ष काशिनाथ भोईर आणि पदाधिकार्‍यांनी भेट घेऊन  लेखी तक्रार केंली असता आठवडाभरात काम करू, असे सांगण्यात आले. त्यानंतर काहीच हालचाल न झाल्याने सोसायटीचे पदाधिकारी प्रकाश विचारे यांनी  त्यांना फोन लावला असता जीर्ण झालेल्या पाइपलाइनला आम्ही किती ठिकाणी ठिगळ लावणार, असा सवाल महाराष्ट्र जीवन प्राधिकरणाचे  कार्यकारी  अभियंता दशोरे यांनी विचारला. पाणीटंचाईची झळ नागरिकांना मोठ्या प्रमाणात बसत असताना महिन्याला हजारो लिटर पाणी फुकट जात आहे. ते वाचवण्याबाबत अधिकारी उदासीन असल्याचे यावरून दिसत आहे.

आम्ही शांतिवन असोसिएशनतर्फे महाराष्ट्र जीवन प्राधिकरणाचे  कार्यकारी  अभियंता दशोरे यांना 22 फेब्रुवारी रोजी निवेदन दिले असता त्यांनी फक्त आश्वासन दिले, पण काहीच केले नाही. पनवेल परिसरात पाणीटंचाई असतानाही अधिकार्‍यांना पाणी वाचवण्याची गरज वाटत नसल्याचे यावरून  लक्षात येत आहे. त्यामुळे पाणी वाचवण्यासाठी आम्ही नाईलाजाने आता जनहित याचिका दाखल करणार आहोत.

-काशिनाथ भोईर, अध्यक्ष,   शांतिवन असोसिएशन