प्रभाग रचनेवरील हरकती, सूचनांवर आज सुनावणी

नवी मुंबई : बातमीदार

नवी मुंबई महानगरपालिका सार्वत्रिक निवडणूक 2022ची प्रारूप प्रभाग रचना 1 फेब्रुवारी रोजी प्रसिध्द करण्यात आली होती. त्या अनुषंगाने राज्य निवडणूक आयोग यांनी जाहीर केल्याप्रमाणे 1 ते 14 फेब्रुवारी रोजी दुपारी 3 वाजेपर्यंत नागरिकांकडून हरकती व सूचना मागविण्यात आलेल्या होत्या. त्यानुसार 3852 हरकती व सूचना पालिकेला प्राप्त झाल्या आहेत. राज्य निवडणूक आयोगाच्या 3 फेब्रुवारी रोजीच्या आदेशानुसार बुधवारी (दि. 17) सुनावणी आयोजित करण्यात आलेली आहे. ही सुनावणी घेण्यासाठ महाराष्ट्र राज्य परिवहन महामंडळाचे  उपाध्यक्ष व व्यवस्थापकीय संचालकांकडे राज्य निवडणूक आयोगाकडून प्राधिकृत करण्यात आलेले आहे. ते विभागीय आयुक्त, कोकण विभाग व जिल्हाधिकारी, ठाणे जिल्हा यांच्या उपस्थितीत नागरिकांनी सादर केलेल्या हरकती व सूचनांवर सकाळी 9 वाजल्यापासून नवी मुंबई महानगरपालिका मुख्यालयाच्या तिसरा मजला येथील ज्ञानकेंद्र येथे सुनावणी घेण्यात येणार आहे. विभाग कार्यालयामार्फत सदर सुनावणीकरिता हजर राहण्यासाठी संबंधितांना सूचनापत्र देण्यात येत आहे. हरकत व सूचनाधारकांनी सूचनापत्रात नमूद केलेल्या वेळेच्या 15 मिनिटे आधी आपले प्राप्त झालेले सूचनापत्र, हरकती व सूचनांसह सुनावणीकरिता उपस्थित रहावयाचे आहे. फक्त हरकती व सूचनाधारकास सुनावणीच्या ठिकाणी प्रवेश दिला जाईल, याची नोंद घ्यावयाची आहे. जे हरकती व सूचनाधारक त्यांना दिलेल्या निश्चित वेळेस उपस्थित राहणार नाहीत किंवा गैरहजर राहतील त्यांची हरकत व सूचना एकतर्फी निकाली काढण्यात येईल, याची नोंद घ्यावयाची आहे. कोव्हीड प्रतिबंधात्मक नियमावलीच्या अनुषंगाने मास्क, सॅनिटायझरचा वापर करण्यात यावा तसेच सुरक्षित अंतर ठेवण्याबाबत सर्वांनी काळजी घ्यावयाची आहे. सर्व हरकती व सूचनाधारकांनी दिलेल्या वेळेच्या 15 मिनिटे आधी नवी मुंबई महानगरपालिका मुख्यालयात ज्ञानकेंद्र येथे उपस्थित राहून सहकार्य करावे, असे आवाहन आयुक्त व निवडणूक अधिकारी अभिजित बांगर यांनी केले आहे.