वढाव येथील यात्रेत भक्तांचा उत्साह व्दिगुणित

पेण : प्रतिनिधी

पेण तालुक्यातील वढाव गावाची बहिरीदेवाची यात्रा दोन वर्षानंतर या वर्षी मोठया उत्साहात साजरी झाली. या यात्रेत मुंबई, ठाणे, पुणे, कोकणातील भाविकांनी मोठ्या संख्येने हजेरी लावली होती.

चैत्र पौर्णिमेच्या एक दिवस अगोदर वढाव गावातील बहिरीदेवाची यात्रा भरली होती. देव काठ्यांची स्पर्धा आणि छबिना (पालखी) सोबत आपल्या अंगावर काटेरी पेरकुट मारणे ही या यात्रेची वैशिष्ट्ये आहेत. या वेळी तरूणांसह ज्येष्ठ मंडळीही पेरकुटे मारण्यात मग्न होती. बहिरीदेवाच्या मंदिरातून दुपारी बारा वाजता देवाचा छबिना निघाला. या छबिन्यासोबत पारंपरिक गीत गाणार्‍या हजारो महिला व पुरुष होते. वढाव, मोठे वढाव, दिव गावात छबिना फिरवून आणण्यात आला.