रायगड प्रीमियर लीगतर्फे डिसेंबरमध्ये रंगणार टी-20 स्पर्धा

कर्जत : बातमीदार
रायगड प्रीमियर लीगतर्फे या वर्षी डिसेंबर महिन्यात टी20 स्पर्धेचे आयोजन करण्यात आले आहे. असोसिएशनकडून यावर्षी जानेवारी ते मार्च या तीन महिन्यांत भरगच्च स्पर्धा भरविण्यात आल्या होत्या. त्यातून पाच खेळाडूंची निवड महाराष्ट्र क्रिकेट संघात झाली आहे आणि त्यामुळे रायगड प्रीमियर लीगबाबत सर्व खेळाडूंना उत्साह आहे. स्पर्धेची तयारी पूर्ण झाली असून खेळाडूंची निवड प्रक्रिया आणि चषकांचे अनावरण एकाच दिवशी
एकाच समारंभात होणार आहे.
सध्याच्या मोसमातील स्पर्धेमध्ये मागील स्पर्धेतील सहभागी संघांना प्राधान्य देण्यात येईल. संपूर्ण स्पर्धा मॅटिंग आणि टर्फ विकेटवर खेळविण्यात येईल. स्पर्धा अधिकृत व्यावसायिक पंचाच्या आणि गुणलेखकांच्या देखरेखीखाली होईल. स्पर्धेसाठी सफेद चेंडू वापरण्यात येईल. सहभागी संघांना आयोजकांतर्फे गणवेश देण्यात येईल. स्पर्धा 1 जानेवारी 1997 ते 1 जानेवारी 2007 या वयोगटातील खेळाडूंसाठी असेल. प्रत्येक संघ 16 खेळाडूंचा असेल. सहभागी संघ आरपीएल-21 या पहिल्या स्पर्धेमध्ये प्रतिनिधित्व केलेल्या त्यांच्या संघामधील सहा खेळाडू (वयाची अट सांभाळून) कायम ठेवू शकतात. उर्वरित आठ खेळाडू लिलाव पद्धतीने घ्यावयाचे आहेत.
दोन खेळाडू बाद फेरी स्पर्धा संपल्यानंतर प्रत्येक संघाला आयोजकांकडून देण्यात येतील. लिलाव प्रक्रियेत बोली न लागलेल्या खेळाडुंची बादफेरीची टी-20 स्पर्धा खेळविण्यात येणार आहे. बादफेरीच्या स्पर्धेमध्ये उत्कृष्ट खेळ करणार्‍या काही खेळाडूंचा मुख्य स्पर्धेच्या संघांमध्ये समावेश करण्यात येणार आहे.
स्पर्धेसाठी संघ प्रशिक्षक आयोजकांना परवानगीने नेमण्याची मुभा देण्यात येणार आहे, मात्र प्रशिक्षक हे रायगड जिल्ह्यातील असावेत अशी आयोजकांची अट असेल.
प्रत्येक संघ मालकाने स्वतःच्या संघाचे एकत्रित सराव शिबीर आयोजित करावयाचे आहे. स्पर्धेमध्ये सहभागी होण्यासाठी खेळाडूंनी अर्ज पुढील काही दिवसांत ऑनलाइन पद्धतीने भरविले जाणार असल्याची माहिती आयोजकांनी दिली आहे.