राष्ट्रीय खो-खो स्पर्धेत साहिल जाधवची सुवर्ण कामगिरी

आमदार प्रशांत ठाकूर यांनी केले कौतुक

पनवेल : रामप्रहर वृत्त
पंजाब येथे झालेल्या स्टुडंट्स ऑलिम्पिक असोसिएशन इंडिया राष्ट्रीय खो-खो स्पर्धेत महाराष्ट्रास सुवर्ण पदक मिळवून देत महाराष्ट्राच्या शिरपेचात मानाचा तुरा रोवणार्‍या तसेच स्पर्धेतील सर्वोत्कृष्ट खेळाडू म्हणून गौरविण्यात आलेल्या रोहा तालुक्यातील पोफळघर संघाचा स्टार खेळाडू महाराष्ट्र संघाचा उपकर्णधार साहिल संतोष जाधव याचे भाजपचे रायगड जिल्हा अध्यक्ष आमदार प्रशांत ठाकूर यांनी भरभरून कौतुक केले.
आपल्या अप्रतिम कामगिरीच्या बळावर साहिलची नुकतीच भारतीय खो-खो संघात निवड करण्यात आली आहे. या वेळी दक्षिण रायगड सरचिटणीस मिलिंद पाटील, रोहा तालुका अध्यक्ष सोपान जांबेकर, अलिबाग तालुकाध्यक्ष परशुराम म्हात्रे, अ‍ॅड. संतोष पवार, प्रमोद गोळे आदी उपस्थित होते.
स्टुडंट्स ऑलिम्पिक असोसिएशन इंडिया राष्ट्रीय खो-खो स्पर्धेत रोमहर्षक व अतीतटीच्या झालेल्या अंतिम सामन्यात अप्रतिम खेळ खेळत महाराष्ट्र संघाने बलाढ्य आंध्र प्रदेश संघाचा पराभव करीत दिमाखात सुवर्णपदक पटकावले. पंजाब येथे झालेल्या याच स्टुडंट्स ऑलंपिक असोसिएशन इंडिया राष्ट्रीय खो-खो स्पर्धेत महाराष्ट्र संघाचा उपकर्णधार रोहा तालुक्यातील पोफळघर येथील स्टार खो-खो खेळाडू साहिल संतोष जाधव याने संपूर्ण सुवर्ण कामगिरी बजावत महाराष्ट्र संघाला विजेतेपद मिळवून दिले. त्याच्या या कामगिरीमुळे या स्पर्धेत साहिलचा सर्वोत्कृष्ट खेळाडू म्हणून सन्मान करण्यात आला. याचबरोबर या स्पर्धेतील साहिल जाधव याने केलेल्या चमकदार कामगिरीमुळे त्याची नुकतीच भारतीय खो-खो संघात निवड झाली.
याच पार्श्वभूमीवर आमदार प्रशांत ठाकूर यांनीदेखील साहिलच्या कामगिरीचे कौतुक करीत पुढील उज्ज्वल भविष्यासाठी शुभेच्छा दिल्या. याच दरम्यान मैदानी खेळाची आवड जोपासणारे तसेच वेळोवेळी खेळाडूंना प्रोत्साहन देत सर्वोतोपरी सहकार्य करणारे आमदार प्रशांत ठाकूर यांचे मोलाचे सहकार्य साहिल जाधव याला त्याच्या या प्रवासात लाभले असल्याचे रोहा तालुकाध्यक्ष सोपान जांबेकर यांनी सांगितले.