पनवेल मनपा क्षेत्राच्या सर्वांगीण विकासासाठी नगररचना संचालकांशी सकारात्मक चर्चा

पुणे ः रामप्रहर वृत्त
पनवेल महानगरपालिका क्षेत्रातील विविध भागांचा विकास आराखडा, शहराचे नियोजन, बांधकाम परवानग्या व लेआऊट मंजुरी तसेच विकसकांना येणाऱ्या अडचणी अशा विविध विषयांवर पनवेल महानगरपालिकेच्या शिष्टमंडळाने गुरुवारी (दि.३०) नगररचना संचालनालयाचे संचालक जितेंद्र भोपळे यांची पुणे येथे भेट घेऊन सविस्तर व सकारात्मक चर्चा केली.
या बैठकीस पनवेल महापालिकेचे महापौर नितीन पाटील, स्थायी समितीचे सभापती बबन मुकादम, माजी सभागृहनेते तथा विद्यमान नगरसेवक परेश ठाकूर उपस्थित होते.
पनवेलचा नियोजित, शाश्वत व सर्वसमावेशक विकास अधिक वेगाने करण्याच्या दृष्टीने विकास आराखड्याची प्रभावी अंमलबजावणी, शहरी नियोजन प्रक्रियेला गती, बांधकाम परवानग्यांमधील सुलभता, नागरिकाभिमुख विकासकामांना चालना देण्यासाठी आवश्यक अशा विविध महत्त्वपूर्ण विषयांवर सकारात्मक विचारविनिमय करण्यात आला.