रोहा-कोलाड मार्गावर झाड कोसळल्याने वाहतूक ठप्प

रोहे : प्रतिनिधी

रोह्यात सलग चौथ्या दिवशीही मुसळधार पाऊस चालू असून कुंडलिका नदी तुंडुब भरून वाहू लागली आहे. मुसळधार पाऊस, सोसाट्याचा वारा यामुळे ठिकठिकाणी झाडे कोसळून पडली आहेत. रविवारी (दि. 4) सकाळी 7 वाजता रोहा कोलाड राज्यमार्गावर ग्रेगोरियन स्कूल येथे झाड कोसळल्याने सलग अडीच तास वाहतूक बंद होती. सुदैवाने शाळेला सुटी असल्याने मोठा अनर्थ टळला. घटनास्थळी वाहतूक पोलीस व रोहा पोलीस यांनी पोहचून या मार्गावरील झाडे बाजूला हटविली. वाहतूक सुरळीत केल्याने तळकोकणात व पुणे या बाजूने जाणार्‍या गाड्या पूर्ववत झाल्या आहेत.