मानवाधिकार संघटनेकडून पालिका सफाई कामगारांना फराळ वाटप

मुरुड जंजिरा ः वार्ताहर            

मुरुड नगर पारिषदेतील सफाई कर्मचार्‍यांना दिवाळीनिमित्त मानवाधिकार संघटनेकडून दिवाळी फराळ व त्यांच्या मुलांसाठी वही, पेन अशा शालोपयोगी वस्तूंचे वाटप नगरपरिषद आवारात रविवारी (दि.27)करण्यात आले. मुरुड शहराची स्वछता अबाधित राखण्याचे काम सफाई कर्मचारी करीत असतात. अत्यंत तुटपुंज्या पगारात शहराची स्वछता राखण्याचे ते काम करीत असल्याने यंदा सफाई कर्मचार्‍यांचा विशेष गौरवसुद्धा मानवाधिकार संघटनेकडून करण्यात आला होता. या वेळी मानवाधिकार संघटनेचे राष्ट्रीय उपाध्यक्ष जाहीद फकजी, मानवाधिकार संघटनेचे सदस्य मुबीन खान, अंकित गुरव, हर्षद साठे, मुरुड तालुका प्रवासी संघटनेचे अध्यक्ष श्रीकांत सुर्वे, मुरुड तालुका पत्रकार संघाचे अध्यक्ष संजय करडे, गणेश चोडणेकर आदींसह असंख्य कर्मचारी, नागरिक मोठ्या संख्येने हजर होते.