सुक्या मेव्याच्या मागणीत वाढ

नवी मुंबई : रामप्रहर वृत्त – दिवाळीत सुक्यामेव्याचा बाजार तेजीत असतो. नेहमीच्या मानाने दुप्पट उलाढाल होते. मात्र सध्या दिवाळीच्या आधीपासूनच सुक्यामेव्याचा बाजार तेजीत आहे. कोरोना काळात रोगप्रतिकारक शक्ती वाढावी म्हणून अनेक लोकांनी त्याचा आहारात समावेश वाढवला आहे. त्यामुळे दरवर्षीच्या मानाने सध्या सुक्यामेव्याला घाऊक बाजारात 25 टक्के मागणी वाढली आहे.

कोरोना काळ सुरू झाल्यापासून प्रत्येकजण रोगप्रतिकारक शक्ती वाढवण्याचा प्रयत्न करत आहेत. त्यानुसार आहार घेत आहेत. परिणामी बहुतेक लोकांनी सुक्यामेव्याचा आहारात समावेश वाढवला आहे. त्यामुळे घाऊक बाजारात सुक्यामेव्याला सध्या 25 टक्के मागणी वाढली आहे. त्यातच दिवाळीसारखा मोठा सण येत असल्याने या मागणीत आणखी वाढ होण्याची शक्यता आहे. मागणी वाढली असली तरी सुक्यामेव्याच्या दरात वाढ झालेली नाही. गेल्यावर्षीच्या तुलनेत यंदा दर स्थिर आहेत. पुढेही दिवाळीसारख्या सणात सुक्यामेव्याला मोठी मागणी वाढण्याची शक्यता आहे, असे मत मसाला बाजाराचे संचालक विजय भूता यांनी व्यक्त केले.

दिवाळीत मिठाई किंवा चॉकलेटऐवजी यावर्षी सुक्यामेव्याला अधिक पसंती मिळण्याची चिन्हे आहेत. दिवाळीत नातेवाइकांना भेट देण्यासाठी सुक्यामेव्याच्या पाकिटांना मागणी असते. आता या मागणीला सुरुवात होत आहे. त्यामुळे दिवाळीच्या तोंडावर ही मागणी 50 टक्क्यांनी वाढण्याची शक्यता व्यापार्‍यांनी वर्तवली आहे.

सध्याचे दर (घाऊक बाजार/रुपये प्रतिकिलो)

अमेरिकन बदाम 800 ते 1500

बेदाणे 200 ते 1000

काजू 800 ते 1500

पिस्ता 800 ते 1500

अक्रोड 500 ते 1500