कोरोनाच्या पार्श्वभूमीवर नागाव ग्रामपंचायतीची औषध फवारणी

रेवदंडा : प्रतिनिधी

कोरोनाचा वाढता प्रादुर्भाव रोखण्यासाठी नागाव (ता. अलिबाग) ग्रामपंचायतीच्या वतीने विविध उपाययोजना करण्यात आल्या असून, निर्जंतुकीकरणासाठी ग्रामपंचायत हद्दीत ठिकठिकाणी औषध फवारणी करण्यात येत आहे, तसेच मास्क न वापरणार्‍यांवर दंडात्मक कारवाई करण्यात येत आहेत.

नागाव ग्रामपंचायत हद्दीमधील जीवनाश्यक वस्तू व सेवांची ठिकाणे, ग्रामपंचायत कार्यालय, पोस्ट ऑफिस, सर्व मेडिकल स्टोअर्स, एटीएम, शासकीय व खाजगी दवाखाने, किराणा माल, भाजी विक्री व रेशन दुकाने, पेट्रोल पंप निर्जंतुकीकरण करण्यासाठी औषध फवारणीचे काम सुरू आहे. तसेच कोरोना पॉझिटिव्ह रुग्णांच्या घरीसुध्दा सॅनिटायझर फवारणी सुरू करण्यात आली आहे.

मास्क न वापरणार्‍यांकडून प्रत्येकी पाचशे रुपये दंड वसुल करण्यात येत असून, त्यासाठी नागावमधील छत्रपती शिवाजी महाराज पुतळा व हटाळे बायपासजवळ मास्क चेकपॉईंट सुरू करण्यात आले आहेत.

प्रत्येकाने ग्रामपंचायत व शासन स्तरावरील नियमांचे काटेकोरपणे पालन करावे तसेच कोरोना विषाणूंची साखळी तोडण्याच्या अभियानास सहकार्य करावे, असे आवाहन नागाव ग्रामपंचायती तर्फे ग्रामस्थांना करण्यात आले आहे.