विद्यापीठे, कॉलेज कर्मचार्‍यांचा सोमवारी लाक्षणिक बंद

मुंबई : येथील विद्यापीठासह राज्यातील सर्व अकृषी विद्यापीठे व महाविद्यालयीन शिक्षकेतर कर्मचार्‍यांचे विविध प्रश्न उच्च व तंत्रशिक्षण मंत्रालयाच्या स्तरावर प्रलंबित आहेत. पाठपुरावा करूनदेखील हे प्रश्न सुटत नसल्याने विद्यापीठ व महाविद्यालयीन शिक्षकेतर कर्मचार्‍यांच्या वतीने सोमवारी (दि. 22) राज्यव्यापी एकदिवसीय लाक्षणिक बंद करण्यात येणार आहे. यामुळे मुंबई विद्यापीठासह राज्यातील सर्व विद्यापीठे व वरिष्ठ महाविद्यालयाचे कामकाज ठप्प होणार आहे. राज्यातील अकृषी विद्यापीठीय व संलग्नित महाविद्यालयीन कर्मचार्‍यांच्या महासंघाच्या कृती समितीने आपल्या विविध प्रलंबित मागण्यांसाठी 16 नोव्हेंबरपासून राज्यव्यापी आंदोलन सुरू केले आहे. त्याचाच एक भाग म्हणून सोमवारी एक दिवसाचा राज्यव्यापी लाक्षणिक बंद करण्यात येत आहे.