आदिवासी विद्यार्थिनींना गुड टच बॅड टचचे धडे

चाइल्ड हेल्प फाउंडेशनचे शैक्षणिक शिबिर

कर्जत ः बातमीदार

हेल्प फाउंडेशन सामाजिक संस्थेने मोतीलाल ओसवाल फाउंडेशन यांच्या सहकार्याने जिल्ह्यातील वांगणी स्थित शासकीय आश्रमशाळेत शैक्षणिक उन्हाळी शिबिराचा समारोप करण्यात आला. दरम्यान चाइल्ड हेल्प फाउंडेशनच्या प्रमुख मीना लोखंडे यांनी विद्यार्थ्यांना लैंगिक छळा विरोधात बोलण्याचे महत्त्व पटवून देण्यासाठी पॉश आणि पोक्सो ही सत्रे आयोजित केली. विद्यार्थ्यांना वाईट आणि चांगल्या स्पर्शाची (बॅड टच गुड टच) जाणीव करून देण्यात आली. वांगणीमधील आठवी ते दहावीपर्यंतच्या 159 विद्यार्थ्यांनी या शिबिराचा लाभ घेतला.

आदिवासी समाजातील विद्यार्थ्यांना अनेक अडचणींचा सामना करावा लागतो आणि योग्य शिक्षणाचा अभाव असतो. विद्यार्थ्यांमध्ये सर्वांगीण विकास घडवून आणणे ही या शिक्षण शिबिरामागील मुख्य कल्पना आहे. आम्ही केवळ त्यांच्या शैक्षणिक विकासावर लक्ष केंद्रित केले नाही, तर योगासारख्या अनेक शारीरिक व्यायामाचे आयोजन केले. या शैक्षणिक शिबिराद्वारे स्वयंसेवकांनी विद्यार्थ्यांना गणित, विज्ञान, इंग्रजी यासारखे शैक्षणिक विषय शिकण्यास तसेच योग आणि क्रीडा सत्रांद्वारे शारीरिक प्रशिक्षण दिले.

डॉ. जयश्री पारेख, पीएचडी. रसायनशास्त्रात, विज्ञान विषयावर सत्र आयोजित केले आणि करिअर समुपदेशन सत्राद्वारे विद्यार्थ्यांच्या त्यांच्या भविष्यासंबंधीच्या शंकांचे निरसन केले.

टीप आणि युक्त्या

उन्हाळी शिबिराच्या उपक्रमांसोबत डॉ. प्रभा रस्तोगी यांनी, बोर्ड परीक्षेत चांगले गुण मिळवण्यासाठी व विद्यार्थ्यांना गणिताचा आनंद घेण्यासाठी टिप आणि युक्त्या शिकवल्या. संस्थेच्या अंजली पटेल यांनी विद्यार्थ्यांना व्याकरण आणि शब्दसंग्रहाचे धडे दिले. कॅन्सरचे सामान्य प्रकार, त्याचे निदान कसे केले जाते आणि उपचार प्रक्रियेकडे कसे जायचे, याबद्दल मुलांना सांगण्यात आले.