विरोधी पक्षनेतेपदावर काँग्रेसचा दावा

विधान परिषदेसाठी प्रदेशाध्यक्ष पटोले आग्रही

मुंबई ः प्रतिनिधी

विधानसभेत राष्ट्रवादी काँग्रेसचा विरोधी पक्षनेता आहे. त्यामुळे विधान परिषदेत आमचा विरोधी पक्षनेता असावा, अशी मागणी काँगे्रेसचे प्रदेशाध्यक्ष नाना पटोले यांनी केली आहे. ते प्रसारमाध्यमांशी बोलत होते. पटोलेंच्या मागणीमुळे आता महाविकास आघाडीत याबाबत काय निर्णय होतोय हे पाहणे महत्त्वाचे ठरणार आहे. राज्यात शिंदे-भाजप सरकार स्थापन झाल्यावर राष्ट्रवादी काँग्रेसचे नेते अजित पवार यांची विधानसभा विरोधी पक्षनेते म्हणून निवड करण्यात आली होती. त्यानंतर विधान परिषदेत आमचा विरोधी पक्षनेता असावा, अशी आमची मागणी असून आम्ही ती राष्ट्रवादीकडे करणार असल्याचे काँग्रेस प्रदेशाध्यक्ष नाना पटोले यांनी सांगितले.राज्यात घडलेल्या राजकीय घडामोडींचा अहवाल पक्षाच्या केंद्रीय नेतृत्वाने मागितल्यानंतर विधान परिषदेतील क्रॉस वोटिंगसंदर्भातील माहितीचा अहवाल हायकमांडला पाठवणार असल्याचेही काँगे्रस प्रदेशाध्यक्ष पटोले म्हणाले.