लोकनेते रामशेठ ठाकूर यांच्यात हिंमत, म्हणूनच त्यांनी करून दाखवले -काँग्रेस जिल्हाध्यक्ष महेंद्र घरत

पनवेल : रामप्रहर वृत्त
लोकनेते रामशेठ मोठ्या उंचीचे व्यक्तिमत्व आहेत. राजकीय चपला बाजूला सारून ते समाजासाठी काम करत असतात. या भागाचा विकास झाला आहे तो त्यांच्या दूरदृष्टीतून आणि प्रयत्नातूनच, कारण लोकनेते रामशेठ ठाकूर यांच्यात हिंमत आहे. म्हणूनच त्यांनी ते करून दाखवले. यामुळे उलवे नोडमध्ये उभारण्यात येणार्‍या शिवसृष्टीच्या अनुषंगाने येथील मैदान लोकनेते रामशेठ ठाकूर यांच्या नावाने ओळखले जाणार असून येथील शिवसृष्टी आणि मैदान हे विभागाच्या नावलौकिकात भर टाकणारे ठरणार आहे, असे प्रतिपादन छत्रपती शिवाजी महाराज अश्वारूढ पुतळा उभारणी व सुशोभीकरण समितीचे सरचिटणीस, काँग्रेसचे जिल्हाध्यक्ष व कामगार नेते महेंद्र घरत यांनी गुरुवारी (दि. 6) शेलघर येथे केले.
मुंबईतील शिवाजी पार्कच्या धर्तीवर उलवे नोडमध्ये महाराष्ट्राचे आराध्य दैवत छत्रपती शिवाजी महाराजांचा अश्वारूढ पुतळा, मैदानाचा विकास आणि त्या अनुषंगाने शिवसृष्टीच्या उभारणी कामाला लवकरच सुरुवात होणार आहे. 19 फेब्रुवारीला शिवजयंतीनिमित्त आयोजित करण्यात येणार्‍या कार्यक्रमांसंदर्भात छत्रपती शिवाजी महाराज अश्वारूढ पुतळा उभारणी व सुशोभीकरण समितीची नियोजन आढावा बैठक समितीचे अध्यक्ष माजी खासदार लोकनेते रामशेठ ठाकूर यांच्या अध्यक्षतेखाली पार पडली. त्या वेळी घरत बोलत होते.
या बैठकीस समितीचे उपाध्यक्ष अरुणशेठ भगत, ज्येष्ठ नेते वाय.टी. देशमुख, भाऊशेठ पाटील, वसंत म्हात्रे, वसंत पाटील, माजी पंचायत समिती सदस्य रत्नप्रभा घरत, विश्वनाथ कोळी, अमर म्हात्रे, माजी सरपंच हरेश्वर म्हात्रे, सागर ठाकूर, सचिन घरत, हेमंत ठाकूर, अमृत भगत, व्ही.के. ठाकूर, किसन पाटील, गजानन घरत, सचिन पाटील, सी.एल. ठाकूर, भार्गव ठाकूर, अनंत ठाकूर, अशोक कडू, उषा देशमुख, कामिनी कोळी, सुजाता पाटील, योगिता भगत, मिनाक्षी पाटील, सुधीर ठाकूर, दर्शन ठाकूर, सुजित ठाकूर, रघूनाथ देशमुख, अनुप भगत, प्रमोद कोळी, गोपी भोईर, महादेव कोळी, भाऊ भोईर, भगवान कोळी, वामन ठाकूर, बाळकृष्ण कोळी, राजकिरण कोळी, विनायक कोळी, वैभव घरत, कमलाकर देशमुख, रोशन म्हात्रे, प्रमोद कोळी, संकल्प घरत, काशिनाथ पाटील, किशोर पाटील, मनोज कोळी यांच्यासह ग्रामस्थ उपस्थित होते.
महेंद्र घरत यांनी पुढे बोलताना सांगितले की, छत्रपती शिवाजी महाराजांचा अश्वारूढ आणि प्रेरणादायी पुतळा उभारण्यासाठी लोकनेते रामशेठ ठाकूर यांच्या नेतृत्वाखाली अनेक वर्षांपासून पाठपुरावा सुरू होता. त्याच अनुषंगाने या ठिकाणी असलेल्या मैदानाला लोकनेते रामशेठ ठाकूर यांचे नाव देण्याचा ठराव ग्रामपंचायतीच्या ग्रामसभेत घेऊन तो पारितही केला गेला. आता या मैदानाचे नामकरण शिवजयंतीच्या पवित्र दिवशी होणार आहे.
लोकनेते रामशेठ ठाकूर स्थानिकांच्या हक्कासाठी लढणारे नेते आहेत. या विभागाचे ते आधारस्तंभ आहेत. त्यांनी गरजेपोटी घरे नियमित करणे, 1984चे आंदोलन, साडेबारा टक्के लढा, जेएनपीटी लढा असो व येथील भूमिपुत्रांचे प्रश्न असो सर्व मार्गी लावत तसेच सढळ हस्ते मदत करत समाजाला मोठा आधार दिला आहे. सामाजिक बांधिलकीतून ते सतत काम करत असतात. प्रत्येक समाजात त्यांचे कार्य आहे. त्यामुळे त्यांना सर्व समाजात मानणारा मोठा वर्ग आहे. ते या भूमीत जन्मले आणि त्यांनी येथील प्रत्येक माणसाचा विचार करत भूमीचा उद्धार केला. त्यामुळे त्यांचा आम्हा सर्वांना अभिमान आहे, असे उद्गारही महेंद्र घरत यांनी काढले. 19 फेब्रुवारीला शिवजयंतीचा कार्यक्रम मोठा झाला पाहिजे यासाठी तयारी सुरू असून या कार्यक्रमाचे महत्त्व जाणून घेत परदेशात होणार्‍या कामगारांच्या बैठकीला जाणार नसल्याचे त्यांनी स्पष्ट केले.

मुंबईतील शिवाजी पार्कचा जसा उल्लेख होतो; त्याचप्रमाणे येथील शिवसृष्टीचे आणि मैदानाचे नाव झाले पाहिजे. त्यासाठी या ठिकाणी सर्व सुविधा देण्याचे काम करण्यात येणार आहे. येथील वास्तू व्यक्तिगत माझी नसून समाजाची मालमत्ता आहे आणि याचा ताबा अधिकार गव्हाण ग्रामपंचायतीकडे राहणार आहे. शिवजयंतीला या ठिकाणी विविध कार्यक्रम आयोजित करून शिवजयंती मोठ्या उत्साहात साजरी होणार आहे.
-लोकनेते रामशेठ ठाकूर, माजी खासदार