मुरूडमध्ये सुरू होणार भात खरेदी केंद्र

किसान क्रांती संघटनेच्या मागणीला यश

मुरूड ः प्रतिनिधी

रायगड जिल्ह्यातील 13 तालुक्यांत एकूण 35 भात खरेदी केंद्रांना मान्यता देण्यात आली असता नेमके मुरूडला वगळण्यात आल्याची वस्तुस्थिती किसान क्रांती संघटनेने तहसीलदारांना 2 नोव्हेंबरच्या निवेदनाद्वारे निर्दशनास आणून देत भात खरेदी केंद्र मंजूर न केल्यास तीव्र आंदोलनाचा इशारा दिला होता. जिल्हाधिकारी निधी चौधरी यांचीही प्रत्यक्ष भेट घेऊन वस्तुस्थिती कथन केली. त्यावर जिल्हाधिकार्‍यांनी येत्या आठ दिवसांत जिल्हा पणन अधिकार्‍यांना मुरूड तालुक्यासाठी भात खरेदी केंद्र सुरू करण्याचे आदेश दिले आहेत.

त्यामुळे शेतकर्‍याने कष्टाने पिकवलेल्या भाताला दलालांकडून वर्षानुवर्षे अल्प किमतीत खरेदी करण्याच्या कृतीला आळा बसणार असून शेतकर्‍याला किमान हमीभाव मिळण्याची आशा निर्माण झाली आहे. या निर्णयाचे सर्वत्र स्वागत होत आहे.