किशोर-किशोरी राज्य कबड्डी स्पर्धा; रायगडचा संघ बाद फेरीत

परभणी ः प्रतिनिधी
यजमान परभणीसह पुणे, मुंबई शहर, मुंबई उपनगर, रायगड, ठाणे, पालघर, कोल्हापूर, सांगली  या जिल्ह्यांच्या संघांनी 32व्या किशोर-किशोरी गट राज्य अजिंक्यपद निवड चाचणी कबड्डी स्पर्धेच्या दोन्ही गटांत बाद फेरी गाठली, तर सोलापूर, नाशिक, रत्नागिरी, सिंधुदुर्ग यांनी किशोरी आणि सातारा, जालना नंदुरबार, औरंगाबाद, अहमदनगर, हिंगोली व जळगाव यांनी किशोर गटात बाद फेरीत प्रवेश केला.
परभणीतील पाथरी येथील कबड्डीमहर्षी बुवा साळवी क्रीडानगरीत सुरू असलेल्या मुलींच्या इ गटात ठाण्याने रत्नागिरीला 30-28 असे चकवित या गटात अग्रक्रम पटकाविला, तर रत्नागिरीने उपविजयी होत बाद फेरी गाठली. ठाण्याकडून प्रतीक्षा सणस, गौरी मांझी, तर रत्नागिरीकडून सारा शिंदे, पूर्णा दळवी यांनी उत्कृष्ट खेळ केला. द गटात कोल्हापूरने सातार्‍याला 34-30 असे पराभूत करीत उपविजयी म्हणून बाद फेरी गाठली. रायगडने सोलापूरला 47-47 असे बरोबरीत रोखल्यामुळे या दोन्ही संघांनी बाद फेरी गाठली. फ गटात नाशिकने सिंधुदुर्गला 59-18 असे पराभूत करून या गटात अव्वल स्थान मिळवित बाद फेरी गाठली. सिंधुदुर्गदेखील उपविजयी ठरले.
मुलांच्या ड गटात नंदुरबारने मुंबई उपनगरला 45-30 असे पराभूत केले. सिद्धार्थ मुरूमकर, विश्वजित साळुंखे नंदुरबारकडून, तर भावेश चिंदरकर, अर्षद चौधरी उपनगरकडून उत्तम खेळले. इ गटात कोल्हापूरने औरंगाबादला 36-32 असे पराभूत करीत बाद फेरी गाठली. शुभम रेपे, प्रेम पाटील या विजयात चमकले. दीपक डाके, संघर्ष इंगोले छान खेळले. फ गटात अहमदनगरने सांगलीला बरोबरीत रोखत बाद फेरीतील आपला मार्ग सुकर केला. सौरभ सिरसाट, गणेश नरवडे नगरकडून, तर युनास पिरजादे, अमित फाळके सांगलीकडून उत्तम खेळले. अ गटात सातार्‍याने ठाण्याला 55-20असे नमवित या गटात प्रथम क्रमांक प्राप्त केला. ब गटात पुण्याने श्रीधर कदम, यश करपे यांच्या चतुरस्त्र खेळाच्या जोरावर सिंधुदुर्गला 47-17 असे नमवले. सतीश मांजरेकर पराभूत संघाकडून उत्तम खेळला.