चौथ्या टप्प्यासाठी आज मतदान ; मावळमध्ये 12,659 अधिकारी-कर्मचारी सज्ज

पनवेल : रामप्रहर वृत्त

लोकसभा निवडणुकीच्या चौथ्या टप्प्यात सोमवारी (दि. 29) नऊ राज्यांतील 71 जागांसाठी मतदान होणार आहे. यात महाराष्ट्रातील 17 जागांचा समावेश असून, सर्वांचे लक्ष मावळ मतदारसंघाकडे लागले आहे. मावळमधील सहा विधानसभा मतदारसंघांसाठी 12 हजार 659 अधिकारी व कर्मचार्‍यांची मतदान प्रक्रियेसाठी नेमणूक करण्यात आली आहे. भौगोलिकदृष्ट्या मोठ्या असलेल्या मावळ लोकसभा मतदारसंघात घाटाखालील पनवेल, कर्जत, उरण या तीन आणि घाटमाथ्यावरील मावळ, चिंचवड व पिंपरी अशा सहा मतदारसंघांचा समावेश होतो. या लोकसभा मतदारसंघात 22 लाख 27 हजार 733 मतदार असून, 2 हजार 504 मतदान केंद्र असणार आहेत. मतदान प्रक्रिया सुरळीत व्हावी यासाठी 12 हजार 659 अधिकारी व कर्मचार्‍यांची नेमणूक करण्यात आली आहे. यानुसार प्रत्येक मतदान केंद्रावर सरासरी सुमारे सहा अधिकारी-कर्मचारी उपस्थित असतील; तर सरासरी 154 मतदारांमागे एक कर्मचारी असणार आहे. निवडणूक निर्णय अधिकारी, सहाय्यक निवडणूक निर्णय अधिकारी, नोडल अधिकारी, मतदान केंद्राध्यक्ष, सहायक केंद्राध्यक्ष, मतदान अधिकारी व कर्मचारी असे मनुष्यबळ तैनात असणार आहे.

मावळ मतदारसंघांतर्गत पनवेल विधानसभा मतदारसंघ सर्वात मोठा असून, तेथे 5 लाख 14 हजार 902 मतदारांसाठी 584 मतदान केंद्र असणार आहेत, तसेच 3260 अधिकारी व कर्मचार्‍यांची नेमणूक करण्यात आली आहे. सर्वात लहान कर्जत विधानसभा मतदारसंघात 2 लाख 75 हजार 477 मतदार आहेत. त्या ठिकाणी 2087 कर्मचारी असणार आहेत.

– राखीव कर्मचार्‍यांचीही नेमणूक

मावळ मतदारसंघातील मतदान केंद्रांत व्हीव्हीपॅट मशीन व इतर साधनांची तंतोतंत जुळणी करण्यासाठी प्रशासकीय यंत्रणेने कंबर कसली आहे. व्हीव्हीपॅट मशीनसंदर्भात निवडणूक विभागाने वेळोवेळी कर्मचार्‍यांना प्रशिक्षणही दिले आहे. मतदान केंद्रांवर मतदानाची प्रक्रिया सुरळीत पार पाडण्यासाठी निवडणूक विभागाने विविध उपाययोजना केल्या आहेत. निवडणूक कार्यालयाने खबरदारीचा उपाय म्हणून राखीव कर्मचार्‍यांची मोठ्या संख्येने नेमणूक केलेली आहे.