पनवेलचे इरफान. एम. भोपाली यांची सिनेक्षेत्रात भरारी

10 जूनला ’मजनू’ येणार प्रेक्षकांच्या भेटीला

पनवेल ः वार्ताहर

सोनाई फिल्म क्रिएशन निर्मित ’मजनू’ चित्रपटाचा टिझर लाँच सोहळा नुकताच मोठ्या दिमाखात झाला असून या  चित्रपटाच्या प्रदर्शनाची तारीख 10 जून जाहीर करण्यात आली. या वेळी इरफान. एम. भोपाली यांनी मराठी फिल्म इंडस्ट्रीला पुढे नेण्याचे स्वप्न असल्याचे भोपाली बोलतांना सांगितले.

प्रदर्शित झालेल्या टीझरमध्ये रोहन पाटील आणि स्वेतलाना अहिरे एकमेकांशी प्रेमळ संवाद साधत आहेत. या टिझरमुळे मजनू हा चित्रपट एक तरल प्रेमकहाणी असेल असे स्पष्ट होत असले तरी नितीश चव्हाण, सुरेश विश्वकर्मा व सहकलाकार यांच्या भूमिकेमुळे या प्रेमकहाणीत कोणते डिस्ट आणि टर्न्स येणार आहेत हे जाणून घेण्यासाठी प्रेक्षकांना अजून थोड़ी वाट बघावी लागणार आहे. ’मजनू’ सिनेमा म्हणजे शाळा संपवून कॉलेजमध्ये प्रवेश घेतल्यानंतर तेथील बंधमुक्त आणि मौजमजेच्या वातावरणात वावरताना प्रत्येक युवक हा स्वतः ला मजनू समजू लागतो मग ते शहर असो की गाव. प्रेमाची खरी ओळख सर्व तरुण, तरुणांना याच काळात होते, त्यांच्या या भावविश्वावर आधारित ’मजनू’ हा चित्रपट फक्त प्रेमकहाणी नसून एक परिपूर्ण पॅकेज आहे. ’मजनू’मध्ये प्रेम, संघर्ष, सस्पेन्स विरह यांसारखे अजूनही विविध पैलू प्रेक्षकांना बघायला मिळणार आहेत, तसेच चित्रपटातील गाणी श्रवणीय असून ती प्रेक्षकांच्या मनावर नक्कीच भुरळ घालतील.

मजनू चित्रपटाचे निर्मात गोवर्धन दोलवाडे, भारत चंगेडे, डॉ. दीपाली गर्ने सानप असून कथा, पटकथा आणि संवाद गोवर्धन दोलवाडे यांचे आहे. चित्रपटात नितीश चव्हाण, रोहन पाटील,स्वेतलाना अहिरे, सुरेश विश्वकर्मा, मिलिंद शिंदे, अरबाज शेख, प्रणव रावराणे, आदिती सारंगधर, माधवी जुवेकर, भक्ती चव्हाण यांच्या महत्त्वपूर्ण भूमिका आहेत. ’मजनू’ चित्रपटाला संगीतकार पी. शंकरम, सचिन अवघडे, साजन विशाल यांचे संगीत लाभले आहे तर गीतकार दीपक गायकवाड आणि गोवर्धन दोलताडे यांच्या गीतांना इंडियन आयडॉल फेम सलमान अली, आदर्श शिंदे, संदीप उबाळे, बेला शेंडे,आनंदी जोशी व विशाल चव्हाण यांचा स्वरसाज लाभला आहे. संकलन चेतन सागडे यांनी केले असून, कला दिग्दर्शक महेश कोरे, डिओपी एम. बी. अळ्ळीकट्टी, साउंड डिझायनर राशी दादा बुट्टे, कॉस्च्युम डिझायनर संदीप गाजुल, पार्श्वसंगीत विनीत देशपांडे यांचे तर कोरिओग्राफर हाईट मंजू आहेत.